भांगरभूंय | प्रतिनिधी
ह्या कॅम्पाचो मुखेल उद्देश आशिल्लो ‘अनेकता में एकता’. एकामेकांची संस्कृताय जाणून घेवप, मेळून मिसळून वागप. भेदभाव पयस करप, आपुलकेचे नातें जोडप, पावलां- पावलांचेर मना जोडप…..
ज्या दिसाची हांव उमळशीकेन वाट पळेतालें तो दीस उजवाडलो. आमी मडगांव रेल्वे स्टेशनाचेर सकाळीं साडेसाताची ट्रेन धरपाक एकठांय जालीं. आमचे प्राॅग्राम अधिकारी सर विकेश गांवकार आमचे बरोबर आशिल्ले. पांच चलयो आनी चार चले असो आमचो पंगड. दनपारच्या दोनांक आमी मंगळुराक पावलीं. ‘योनोपोया विद्यापीठाची बस आमका हाॅस्टेलांत घेवन गेली. जेवणाचा आस्वाद घेतलो. कार्यावळीचो ब्रोशर आमच्या हातांत आशिल्लो. धवें टी शर्ट, आयकार्ड, नोट पॅड, पेना सकट फोल्डर मेळ्ळो. मागीर आमीं सगळीं लोटस् कॅफेंत कार्यावळींचेर चर्चा, तयारी केली.
गोंय, गुजरात, अस्तंत बंगाल, महाराष्ट्र, तामीलनाडू आनी कर्नाटक अशे आमचे स पंगड आशिल्ले. हातूंत फकत आमचो गोंयचो पंगड पिरायेन सगळ्यांत ल्हान. उरिल्ले पांच पंगड विद्यापीठाचे आशिल्ले. कॅम्पाच्या पयल्या दिसा सकाळीं फुडें झेडो हुबयलो. मागीर आमकां दर्यावेळ नितळ करपाक व्हेलीं. सगळ्यांक वळीन उबीं करून आमचो वीस- वीस जाणांचो पंगड केलो. ह्या कॅम्पाचो मुखेल उद्देश आशिल्लो ‘अनेकता में एकता’. एकामेकांची संस्कृताय जाणून घेवप, मेळून मिसळून वागप. भेदभाव पयस करप, आपुलकेचे नातें जोडप, पावलां- पावलांचेर मना जोडप, आत्मविश्वास वाडोवप, मोगान एकामेकांक समजून घेवप.
सरान प्रत्येक पंगडाक न्हंयेचीं नांवां दिवपाक सांगिल्लीं. अशें तरेन दरेका पंगडान नांव दिल्लें. हांवें म्हज्या पंगडाक ‘ब्रह्मपुत्रा न्हंय’ नांव दिलें. हांव ताचें लिडर आशिल्लें. म्हाका सगळे सर यंगेस्ट लिडर अमांग आॅलl म्हूण पाचारताले.
ग्रूप लिडरांक जेन्ना बसकेक आपयताले तेन्ना मात्शीं म्हजी फजेती जाताली. कित्याक म्हाका कन्नड भास समजनाशिल्ली. पूण सर म्हाका इंग्लीशींत अणकार करून समजायताले.
दर दिसा एक- एक पंगड बावटो हुबयतोलो. सांजवेळार मनोरंजनाचे कार्यक्रम करपाची संद आमकां मेळटाली. हें करता आसतना दीस कशें वतात, तें कळनाशिल्लें. आमी आमच्या कार्यावळींनी इतलीं बुडून वतालीं की आमकां वेळाचें पसून भान उरनाशिल्लें. पोस्टर सर्त, देशभक्तीपर गीतां अश्यो जायत्यो कार्यावळी जाल्यो. त्यो करतना हांव गोंयकार, ते मराठी, ते गुजराती अशें विसरून गेलीं. कित्याक आमका हांगा परंपरा आनी संस्कृतायेचें दिवप – घेवप दाखोवपाची संद मेळ्ळिली. रस्सीखेच सर्तीची तर खूबच मजा आयली. ही उमेद वाडोवपाक सगळे सर वांटेकार जाले आनी मजा घेतली.
अशे हे सात दीस कशे आयले आनी कशे गेले तें कळ्ळेंच ना. हांसत- खेळत एकमेकांच्या सहवासांत आनी गोडविकायेन आमचें सगळें दीस म्होवाळ जाले. खावपा- पिवपाचेर तर आमी भरपूर ताव मारलो. पूण हो कॅम्प आमकां सगळ्यांक एकठांय कशी रावप हाची शिकवण दिवन गेलो. इतलेंच न्हय तर वेळाचें भान, जापसालदारकी, शिस्त, आत्मविश्वास हांची प्रेरणा दिवन गेलो. Unity in Diversity हाची जाणीव ह्या शिबिरान करून दिली.
जड अंतःकरणान आमी सगळ्यांचो निरोप घेतलो आनी आपापल्या घरा परतलीं.
– निधी देसाय
अवर लेडी आॅफ रोझरी हायर सेकंडरी, दोनापावल
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
