भांगरभूंय | प्रतिनिधी
फाटल्या दोन सप्तकां सावन जबरदस्त प्रदर्शन करपी भारताचे सात्विकसाईराज रंकीरेड्डी आनी चिराग शेट्टी हे बॅडमिंटन जोडयेन बीडब्ल्यूएफ डबल रॅंकिंगेंत परतून पयली सुवात मेळयली.
पोरूं हांगझू जाल्ले आशियायी खेळां सर्तींत इतिहासीक भांगरा पदक जिखल्या उपरांत भारताची जोडी दुसरे खेपे पयले सुवातेर पावली. चीनाची लियांग वे केंग आनी वांग चेंग ही जोडी दुसरे सुवातेर घसरली.
सात्विक-चिराग ही जोडी अंदूं अजून मेरेन दोन सर्तींत खेळ्ळ्या आनी दोनूय सर्तीचे फायनलींत सुवात मेळोवपाक येसस्वी थारली. 21 जानेवारीक भारताची जोडी इंडिया ओपनाचे फायनलींत सुवात मेळयिल्ली. पूण, दक्षीण कोरियाचे जोडये कडल्यान 21-15, 11-21, 19-21 अशा प्रकारान हार घेवची पडली.
ते पयलीं भारताची जोडी मलेशिया ओपनाचे फायनलींत लेगीत पाविल्ली. पूण, त्या वेळार चीनाचे जोडये कडल्यान तांकां हार घेवची पडिल्ली.
फाटल्या हंगामांत सात्विक-चिराग जोडयेन उत्कृश्ट प्रदर्शन केल्लें. आशिया चॅम्पियनशीप, आशियायी खेळां सर्त आनी इंडोनेशिया ओपन सुपर 1000 सर्तीचें तांणी किताब जिखिल्ले.
मजगतीं, एकोड्या गटांतले रॅंकिंगेंत एच एस प्रणय एक सुवातेच्या फायद्या सयत आठवे सुवातेर पावलो. जाल्यार लक्ष्य सेन, किदाम्बी श्रीकांत आनी प्रियांशू राजावत वळेरेन 19वे, 25वे आनी 30वे सुवातेर उरले.
बॅडमिंटन रॅंकिंग सर्तीचे ग्रेड वरवीं थारता. बीडब्ल्यूएफ वर्ल्ड रॅंकिंगेंत सुपर 1000, 750, 500, 300 आनी सुपर 100 मॅची जातात. रॅंकिंगे प्रमाण जैतिवंताक गूण फावो जाता. जशें की सुपर 1000तले सर्तींत जैतिवंताक 12 हजार गूण मेळटात. जाल्यार सुपर 100 सर्तींत जिखपी खेळगड्याक 5500 गूण मेळटात.
सगल्यांत चड 13 हजार गूण वर्ल्ड चॅम्पियनशीप आनी ऑलिम्पीक खेळां सर्तींत जिखल्या उपरांत मेळटात. वट्ट गुणांच्या आदाराचेर संवसारीक रॅंकिंग निश्चीत जाता. जैतिवंता खेरीत फायनलींत सुवात मेळोवपी, सेमी फायनलींत सुवात मेळोवपी सावन सर्तींत वांटेकार जावपी बॅडमिंटन खेळगड्यांक लेगीत ग्रेड आनी सिडिंग प्रमाण गूण दितात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
