भांगरभूंय | प्रतिनिधी
भांगरभूंय । प्रतिनिधी
पोरणे गोंयः शांतताय भंग करतले ह्या दुबावा वयल्यान फोंड्याच्या उपविभागीय न्याय दंडाधिकाऱ्यान भोमांतल्या 22 जाणांक नोटीशी धाडून तांकां 2 फेब्रुवारीक आपल्या न्यायालयांत हाजीर रावपाक सांगलां. फुडले स म्हयने ओगी रावपा खातीर धा हजारांचो बोंड आनी तितलेच रक्कमेचो हमिदार तांचे कडल्यान कित्याक घेवचो न्हय हाची कारणां तांकां दिवपाक सांगला.
पोरूं 20 डिसेंबराक भोमकारांनी बांदकाम खात्याच्या अभियंत्याक गांवांत म्हामार्ग रुंदिकरणा खातीर सर्वेक्षण करतना आडमेळे हाडल्ले. ताची याद करून दिवन तुमी असो प्रकार परत करचे नात हें कित्या वयल्यान सांगतले अशें तांका नोटिशींत विचारलां. नोटिशी धाडून आमचो आवाज बंद करपाचो यत्न सरकारान चलयला असो आरोप भोमकारांचो फुडारी संजय नायक हाणे केला. म्हामार्ग रुंद करपाक विरोध करपाक आमी जें आंदोलन सुरू केलां तें बंद करपाचो व्हो एक डाव आसा. असल्या नोटिशींक आमी भीक घालचे नात अशें ताणे सांगलें.
फाटल्या डिसेंबराक अधिकारी जेन्ना सर्वे करपाक आयिल्ले तेन्ना आमी तांकां फकत रस्तो रुंदिकरणाचो प्लॅन दाखोवपाक सांगल्लें. मात तांणी तो दाखोवपाक न्हयकार दिलो आनी सर्वेक्षणाचें काम सुरू केल्ल्यान लोक तिडकल्ले अशी म्हायती ताणे दिली. सध्या गोंयांत हुकूमशाही आसा आनी लोकांचो आवाज चेपून वडोवपा खातीर हे सरकार खंयच्याय पांवड्यार वचपाक फाटीं फुडें पळोवचे ना हें नोटिशीं वयल्यान सिद्ध जालां अशें नायकान सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
