भांगरभूंय | प्रतिनिधी
भांगरभूंय । प्रतिनिधी
मडगांवः आपल्या नुवें मतदारसंघात मुळाव्या सुविधाची उदरगत करपा खातीर आलेक्स सिक्वेरा हांणी भाजपात प्रवेश करपाचे पावल घातलें. ताका लागून ताच्या मतदारसंघांतल्या लोकांचो फायदो जातलो अशें मुख्यमंत्री डॉ प्रमोद सावंत हाणे नुवे मतदारसंघांतल्या लोकां वतीन नागोवा- वेर्णा हांगा एके कार्यावळींत कायदो मंत्री आलेक्स सिक्वेरा हाचो भोवमान केलो.
आमचे पंतप्रधान नरेंद्र मोदी देशांतल्यो बायलो, शेतकार, तरणटे आनी गरिबाच्या उत्थानाचेर भर दितात. ताणी गरीबां खातीरची मुफत रेशन दिवपाची येवजण फुडल्या पांच वर्सा खातीर वाडयल्या. अपुंगळ व्यक्ती खातीर राज्य सरकारान जीएमसीत प्रधानमंत्री दिव्यांश केंद्र सुरू केलां अशें मुख्यमंत्र्यान सांगलें.
भोवमानाक जाप दितना सिक्वेरा हांणी लोकांनी दिल्लो मोग आनी दाखयल्ल्या विस्वासा खातीर तांचे उपकार मानले. दोन वर्सां आदीं आमदार म्हणून वेंचून येवचे पयलीं ज्या पक्षाचेर तिकेटीचेर वेंचून आयलां तो पक्ष सोडचो ना अशें हावें लोकांक वचन दिल्लें. मात भाजपान सरकार स्थापन करतगीर मतदारसंघाची उदरगत करपा खातीर सरकारांत आसप गरजेचें आशिल्लें. वेंचणुके मजगतीं लोकांक दिल्ली आस्वासना पुराय करपा खातीर आपल्याक भाजपा प्रवेश करचो पडलो अशें ताणे स्पश्ट केलें. मुख्यमंत्र्यानी मतदारसंघांतल्या लोकां खातीर वालंकिणी भोंवडी आयोजीत केली. मरिना प्राथमीक शाळेक मान्यताय दिली. थळावे उदरगत येवजणे खाला एक हजार लीटर तांकीच्या 5 हजार उदका टांक्यो मंजुर केल्यो अशेंय ताणे सांगलें.
भोवमान कार्यावळींत सभापती रमेश तवडकार, राज्यसभा खासदार आनी भाजपा प्रदेशाध्यक्ष सदानंद तानावडे, वीज मंत्री सुदिन ढवळीकार, उदका स्रोत मंत्री सुभाष शिरोडकार, कृशी मंत्री रवी नायक हाची भाशणा जालीं. मडगांवचो आमदार दिगंबर कामत, आदलो खासदार नरेंद्र सावयकार, आदलो खासदार विनय तेंडुलकार, आदलो आमदार दामू नायक, बाबू कवळेकार, रोमानिया रॉड्रिग्ज आनी फादर डायगो फर्नांडीस हाजीर आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
