भांगरभूंय | प्रतिनिधी
भांगरभूंय । प्रतिनिधी
वास्कोः जानेवारी म्हयनो सोपपाक आठ दीस आसता तरी मुरगांव पालिकेच्या कामगारांक अजून डिसेंबर म्हयन्याचो पगार मेळूं ना. 25 जानेवारी मेरेन पगाराची वाट पळोवन 27 जानेवारीच्यान काम बंद करपाची शिटकावणी कामगार संघटनेन दिल्या. सध्या पालिकेची अर्थीक स्थिती डळमळीड जाल्या. तातूंत मुख्याधिकारी जयंत तारी हाची कांय दिसां आदी बदली जाली आनी दीपेश प्रियोळकार व्हो मुख्याधिकारी म्हणून आयला. ताका पालिकेच्या अर्थीक स्थिती विशीं कांय खबर नाशिल्ल्यान आतां ताच्या सामकार कर्मचाऱ्यांच्या पगाराचो प्रस्न उबो आसा.
फाटल्या कांय म्हयन्यां सावन मुरगांव पालिकेची तिजोरी रिकामी आसता. ताका लागून कर्मचाऱ्याचो पगार वितरीत करतना अधिकारी वर्गांची धांवपळ जाता. कर्मचाऱ्यांक म्हयन्याचे एक तारखेक केन्नाच पगार मेळना. पंदरा वा वीस दिसांनी तो मेळटा. ताका लागून तांका रिणाचे हप्ते आनी हेर प्रश्न उबे रावतात. पगार वेळार मेळचो हे खातीर कर्मचाऱ्यांनी आवाज उठयलो तरी ताचो कांय फायदो जालो ना. पालिका अधिकाऱ्यांक हांगा थंय अशें करून पगाराची रक्क्म एकठांय करची पडटा. ह्या वेळार धांवपळ करून लेगीत तांच्या हाताक कांय लागलें ना. ताका लागून पगार कसो दिवचो व्हो प्रस्न तांकां सतावपाक लागला.
कर्मचाऱ्यांनी आपल्यो समस्या मजूर आयुक्ता सामकार मांडल्ल्यो. मुरगांव पालिकेच्या अर्थीक स्थितीक लागून कर्मचाऱ्यांक कसल्या कसल्या लाबां पसून वंचीत रावचे पडटा हाची वळेरीच तांणी सादर केल्ली. जे कर्मचारी पंदरा- वीस वर्सां आदीं निवृत्त जाल्यात तांकां अजून निवृ्त्ती वेतन मेळना. जे कर्मचारी फाटल्या पंदरा वर्सां सावन काम करतात तांकां अजून नोकरेंत कायम केल्लें ना. कर्मचाऱ्यांची थकबाकी, म्हारगाय भत्तो थकबाकी अजून दिली ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
