सौर उर्जेची सुर्योदय येवजण

भांगरभूंय | प्रतिनिधी

बरींच वर्सां साबार सरकारांनी राज्य, देशांत यत्न करुनय सौर उर्जा तितली येसस्वी जावंक ना. रांदपाचो गॅस कांय वर्सां भितर घराघरांनी पावलो, तशें हें उर्जेचें जालें ना.

अयोध्येंत काल सोमारा रामलल्लाचे मुर्तीची प्राणप्रतिश्ठापना जाली. संवसारांतल्या करोडो भाविकांनी हो उत्सव पळयलो. खुद्द देवूळ आनी सरभोंवतणच्या वाठारांत हजारांनी भावीक जमिल्ले. चुकूनच अणभवपाक मेळटा, असो हो सुवाळो आशिल्लो. प्रधानमंत्री नरेंद्र मोदी हांचे हस्तुकीं धर्मीक विधी जाले. तांणी ह्या सुवाळ्या उपरांत ट्विटरा (एक्स) वयल्यान एक म्हत्वाची घोशणा केली. ती सगल्यांनी चालीक लायली जाल्यार देशाक खूब फायदो जातलो, हातूंत दुबाव ना. प्रधानमंत्री मोदी सांगतात, ताका प्रामाणीकपणान पाळो दिवपी लाखांनी लोक भारतांत आसात. म्हणटकच ही येवजण तळागाळांत पातळप तशें कठीण न्हय. ही घोशणा जावन आसा, प्रधानमंत्री सुर्योदय येवजण!!
प्रभू रामचंद्र हे सुर्यवंशी हें सगल्यांकूच खबर आसा. मोदी हांणी आपल्या पोस्टांत म्हणलां, ‘भगवान श्रीरामाच्या आशिर्वादान संवसारांतल्या तांच्या भक्तांक सदांच उर्जा मेळटा. आयज अयोध्येंत प्राणप्रतिश्ठा सुवाळ्याच्या पवित्र समयार म्हजो संकल्प आनीक दृढ जाला की, भारतांत प्रत्येक नागरिकाच्या घराचेर स्वताची सौरउर्जा यंत्रणा (सोलर रुफ टाॅफ सिस्टम) आसची! सरकार एक कोटी घरांचेर ही यंत्रणा बसोवपाचें लक्ष्य दवरून कामाक लागतलें. हाका लागून गरीब आनी मध्यमवर्गाक लायटीचें बील उणें येतलेंच. तशेंच आमचो भारत उर्जा मळाचेर आत्मनिर्भरुय जातलो.’ नागरिकांचें सहकार्य मेळ्ळ्यार ही येवजण सहज येसस्वी जातली. सौर पॅनल घेवपी सगल्यांक सरकारी मजत मेळटा. पूण, जांकां शक्य आसा, तांणी सरकारी अनुदानाची वाट पळयनासतना स्वता जावन हें पॅनल विकत घेवंक जाय. आमच्या गोंयांत उदक तापोवपा खातीर सौर उर्जेचो वापर चड जाता. कांय घरांचेर हे पॅनल दिसतात. फाटीं गांवगिऱ्या वाठारांनी लायटी खातीर ही उर्जा वापरताले. कांय कडेन स्ट्रीट लायटी खातीर तांचो वापर जातालो. अजून जाता जाल्यार थंयच्याच लोकांक खबर आसतलें. मात, फाटलीं बरींच वर्सां साबार सरकारांनी राज्य, देशांत यत्न करूनय सौर उर्जा तितली येसस्वी जावंक ना. रांदपाचो गॅस कांय वर्सां भितर घराघरांनी पावलो, तशें हे उर्जेचें जालें ना. सरकारान अनुदान, सवलती दिवन पसून!!
गुजरातांतलें मोधेरा गांव देशांतलें पयलें सौर उर्जा वापरपी गांव थारलां. थंयचे सगले लोक पॅनलां वरवीं तयार जावपी स्वताची वीज वापरतात. विजेचीं उपकरणांय सौर उर्जेचेर चलतात. उदक तापोवपूय ताचेरूच जाता. देशांतल्या कांय गांवांनीय बरेच लोक ही उर्जा वापरतात. मात तांचो आंकडो तसो उणो. चडशे लोक ती वापरतात फक्त न्हांवपाचें उदक तापोवपाक. तिचो चडांत चड वापर करपाचे केंद्र सरकारान थारायलां आनी ते नदरेन रोखडेच यत्न सुरू जातले. आतां सगलें जनतेच्या हातांत आसा. देशाचे अर्थीक उदरगती खातीर हे येवजणेक सगल्या भारतीयांनी खांद मारपाक जाय.
पारी- फ्रान्साचे तरणाटे एडमंड बॅक्वेरेल हांकां सौर उर्जे विशीं 1839 त कल्पना सुचली. सौर उर्जेंत दवरल्यार कांय धातूंतल्यान व्हाॅल्टेज आनी करंट येता हाचो तांकां सोद लागलो. अमेरिकन शास्त्रज्ञ रसेल एस. ओहल हांणी 1841 त पयले सिलिकाॅन सौर सेल तयार केली. आयच्या सोलर फोटोव्होल्टेक पॅनलांत पसून अजून तांणीच तयार केल्लें डिझायन वापरतात. सुर्या पसून वत मेळटा, ताचे ते पॅनल उर्जेंत रुपांतर करतात. कूड, उदक गरम करपाक आनी लायट तयार करपाक तांचो वापर जाता. शेतांनी लायट जाय पडटा, थंय हे पॅनल वापरतात. ताचे पसून घराक फावोशी लायट मेळटा. उपकरणां चलोवपाक मेळटा. आमच्या भारतांत हें तंत्रज्ञान तशें उसरांच पावलें. सध्या राजस्थान 70 हजार मेगावॅट सौर उर्जे सयत देशांत पयल्या क्रमांकाचेर आसा. चीन संवसारांत पयलो आसा. थंय दोंगरानी सौर उर्जा पॅनल बसयल्यात. पुराय चिनांत सादारण 430 गिगावॅट सौर उर्जा तयार करता. आमचो भारत अक्षय उर्जा, पवन उर्जेचे बाबतींत संवसारांत चवथ्या क्रमांकाचेर आसा. पूण लोकसंख्येचे तुळेन कमीच लोक सौर उर्जा वापरतात. बिगर जिवाश्म इंधनाचेर आदारीत उर्जे बाबतींत आमी 2030 मेरेन 500 गिगावॅट उर्जा मेळोवपाचें लक्ष्य दवरलां. ते खातीर सगल्यांक यत्न करचे पडटले. 2004 त अक्षय उर्जा दीस पाळप सुरू जालें. मात जावंक जाय तशी जागृताय जाली ना. आतां केंद्र सरकारान एक कोटी घरांचे सौर उर्जा पॅनल बसोवपाची मोख दवरल्या. ती पुराय जाल्यार कोळसो, उदका पसून तयार जावपी विजेची खूब बचत जातली आनी ताचो फायदो आमच्या देशाकूच जातलो.