भांगरभूंय | प्रतिनिधी
काणकोण: काल अयोध्येंत रामलल्लाच्या मुर्ती प्रतिश्ठापना निमतान सकाळीं 10 वरां सावन श्रीरामाच्या भक्तां मदीं उत्साह दिसून आयलो. ह्या वेळार विवीध राम भक्तांनी श्रीरामाचें कटआवट तयार करून हाडिल्ले. त्या कटआवटांक रंगीत लायटी घालून चौकाचौकांत हे कटआवट उबे केल्ले. जाल्यार काणकोणच्या मुखेल बाजारांत केशरी रंगाच्यो पताको लायिल्ल्यो. काणकोणचे नगराध्यक्ष रमाकांत नायक गांवकार हांणी रामलल्लाचे कटआवट आनी प्रतिमा आशिल्लो रथ तयार केल्लो. त्या रथाची मिरवणूक आयतारा रातींच पालिका वाठारांत काडिल्ली. जाल्यार काल (सोमारा) काणकोण कदंबा बस स्टॅण्डा कडल्यान मिरवणुकेक सुरवात जाली.
सुरवातेक काणकोणचे आमदार आनी सभापती रमेश तवडकार आनी नगराध्यक्ष रमाकांत नायक गांवकार हांणी श्रीरामाचे प्रतिमेक फुलां अर्पण करून मिरवणुकेक सुरवात केली.
ह्या वेळार उपनगराध्यक्ष नार्सिस्को फर्नांडीस, नगरसेवक धीरज नायक गांवकार, सारा देसाय, भाजपाचे गोंय राज्य सचीव सर्वानंद भगत, दक्षीण गोंय उपाध्यक्ष महेश नायक, भाजपा मंडळ अध्यक्ष विशाल देसाय, विवीध पंचायतीचे सरपंच, पंच तशेंच कॉग्रेस पक्षाचे फुडारी जनार्दन भंडारी, जी.सी.ए.चे उपाध्यक्ष शांबा देसाय, बबेश बोरकार, दिलीप केंकरे, सम्राट भगत, श्रीमल्लिकार्जून देवस्थान कमिटीचे अध्यक्ष विठोबा देसाय, किशोर शेट, पंकज नायक गांवकार आनी हेर मानेस्त हाजीर आशिल्ले.
ही मिरवणूक चावडी वेल्या श्रीमारुती देवळा मेरेन येवन उपरांत पालिका वाठारांत मिरवणूक काडली. हे मिरवणुकेक हजारांनी रामभक्त वांटेकार जाल्ले. रामाचे प्रतिमेक सवायशिणींनी दिवे दाखोवन पुजा केली. जाल्यार राजस्थानी समाजाच्या वेपाऱ्यांनी आपलीं दुकानां बंद दवरून तेवूय हे मिरवणुकेंत वांटेकार जाले. मिरवणुकेचें येसस्वी आयोजन केल्ले खातीर राजस्थान समाज समितीन 51 हजार रुपयांची देणगी दिली. ती देणगी चावडे वेल्या श्रीमारुती देवळाक दितले अशें नगराध्यक्ष रमाकांत नायक गांवकार हांणी जाहीर केलें.
पैंगीणच्या धोल, ताशें पंगडाच्या गजरांत काल काणकाेण पुरायपणान श्रीराममय जाल्लें पळोवंक मेळ्ळें. श्रीमारुती देवस्थानांत पुजेचें आयोजन केल्लें. पुजा जाले उपरांत तिर्थप्रसादा उपरांत नगराध्यक्ष रमाकांत नायक गांवकार हांणी सुमार एक हजार भाविकां खातीर म्हाप्रसादाच्या जेवणाचें आयोजन केल्लें. ह्या कार्यावळीचें सुत्रसंचालन संजय कोमरंत हांणी केलें.
सांजवेळा काणकोणकारांनी चावडी ते श्रीस्थळ मल्लिकार्जून देवळा मेरेन चलत दिंडी मिरवणूक काडली. विवीध समाजा वतीन दुचाकीच्यो मिरवणुको काडल्यो.
काल रामोत्सव मनोवपाचो आशिल्ल्यान काणकोणांतल्या 75 देवळांनी विवीध कार्यावळी व्हड उमेदीन मनयल्यो. हातूंत राम जप, मंत्रोच्चार, भजन, हनुमान चाळीसा पठण अशा विवीध कार्यावळींनी रामभक्त वांटेकार जाल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
