भांगरभूंय | प्रतिनिधी
भांगरभूंय । प्रतिनिधी
म्हापशेंः पोर्तुगेज रावटींत जल्माक आय़िल्ल्या पालकांची भुरगी विदेशांत जल्माक आयलीं तरी तांका भारतीय नागरिकत्व दिवपाक जाता असो निश्कर्श काडून युगांडांत जन्मल्ल्या एके भारतीय बायलेक भारतीय पासपोर्ट दिवपाचो आदेश मुंबय उच्च न्यायालयाच्या गोंय खंडपिठान दिला. न्यायमूर्ती महेश सोनक आनी वाल्मिकी मिनेझीस हांच्या खंडपिठान आंबेली वेळ्ळी हांच्या लॉर्डीस जेनिफर लोबो हिचे याचिके संबंदी व्हो आदेश दिला.
लोबो ही शिक्षिका आसा. तिणे भारतीय पासपोर्टा खातीर 3 मार्च 2019 दिसा पणजींतल्या पासपोर्ट कार्यालयांत केल्लो अर्ज तांणी तशेंच परराष्ट्र मंत्रालयान भायर मारल्लो. लोबो ही भारतांत जल्मल्ली ना अशें कारण अर्ज भायर मारतना केल्लो. तिणे ताका गोंय खंडपिठांत आव्हान दिल्लें. लॉर्डीस लोबोच्या पालकांचो जल्म पोर्जुगेज तेंपार गोंयांत जाल्लो. लग्ना उपरांत आवय- बापूय युगांडा देशांत गेल्ली. थंय 3 जून 1963 वर्सा लॉर्डीस हिचो जल्म जाल्लो. 14 जानेवारी 1965 दिसा आवय आनी बापूय चलयेक घेवंन गोंयांत आयलीं.
लोबोचे पालक पोर्जुगेज राजवटींत गोंयांत जल्मल्ली, पूण लॉर्डीस हिचो जल्म भारता भायर युगांडांत जालो. तिका देशांत हाडिल्ल्याचें पालकांनी डिक्लेर करूं ना. ताका लागून ते भारतीय नागरीक थारना अशें कारण अर्ज भायर मारतना पासपोर्ट कार्यालयान दिल्लें.
भारतीय नागरिकत्व आदेश कायदो 1962 प्रमाण दरेक व्यक्ती वा जांचे आवय बापूय 20 डिसेंरर 1961 पयलीं गोंयांत जल्मल्ले तांका त्या दिसा सावन ते भारतीय नागरीक जाल्ले. याचिकादार युंगाडांत जरी जल्मली तरी तिचे पालक पोर्तुगेज राजवटींत गोंयांच जल्मल्ल्यान ते भारतीय आसात. तांची चली लेगीत भारतीय थारता तेन्ना तांका खंडपिठान पासपोर्ट दिवपाक सांगला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
