भांगरभूंय | प्रतिनिधी
भांगरभूंय । खबरां मेज
पणजीः गोंय विद्यापीठ, शणै गोंयबाब भाशा आनी साहित्य महाशाला आनी कोंकणी अध्ययन फाट्याच्या कोंकणी सरस्पत मंडळान आस्मिताय दीस मनयलो. कार्यावळीक मुखेल सोयरे म्हणून नामनेचे लेखक आनी समाजीक कार्यकर्ते श्री एन. शिवदास हाजीर आसले. मानाची सोयरी म्हण महाशालेची उप अधिष्ठती प्रो. वृषाली मांद्रेकार, कोंकणी अध्ययन फाट्याचो संचालक डॉ. हनुमंत चोपडेकर, कोंकणी सरस्पत मंडळाची संयोजक प्रा. सानिका गांवकार तशेंच संशोधनाचे उप अधिष्ठाते डॉ. प्रकाश पर्येकार, आनी हेर अध्ययन शाखेंतले शिक्षक वर्ग आनी विद्यार्थी हाजीर आशिल्ले.
ह्या कार्यावळींत ‘16 जानेवारी 1967 आदीं घडलें कितें?’ ह्या विशयाचेर . एन. शिवदास हांचे कडेन विद्यार्थी पलाश अग्नी आनी चित्रलेखा सावंत हांणी संवाद सादलो. एन शिवदास 14 वर्साचे पिरायेचेर गोंयच्या विलिनीकरणा आडचे चळवळींत वांटेकार जाले. त्या वेळार तांकां कितले त्रास सेशचे पडले आनी एकंतर चळवळीचो अणभव ह्या वेळार विद्यार्थ्यांनी तांचे कडेन संवाद सादलो
येवकाराचें आनी प्रस्तावीक उलोवप डॉ. हनुमंत चोपडेकर हांणी केले आनी जनमत कौल कितलो महत्वाचो आसा हें भुरग्यांक
सांगलें. ह्या वेळार तांणी आमकां गोंयकारांक जितलो मुक्ती दीस महत्वाचो आसा तितलेंच महत्व आमी जनमत कौलाक दिवप गरजेचें अशें सांगलें. ह्या वेळारप्रो. वृषाली मांद्रेकार हिणे जनमत कौल हो कोंकणी मनशाचोच नासून तो सगळ्या गोंयकारांचो आसा हाची आमकां जाणीव आसपाक जाय अशें सांगलें कार्यावळीचे सुत्रसंचालन प्राजक्ता गांवकार हिणे केलें आनी सानिका गांवकार हिणे उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
