भांगरभूंय | प्रतिनिधी
खबरां संस्था
क्राईस्टचर्चः पाकिस्तानान न्युझिलंडा आड टी-20 माळेंत क्लिन स्पीप जावपा पसून स्वताक वाटायलें. पांचवे मॅचींत तांणी 42 धांवड्यांनी जैत मेळयलें. स्पिनरांनी 6 विकेटी घेवन पंगडाची लज राखली. पाकिस्तानान पयलीं खेळून 8 आवट 134 धांवड्या केल्यो. ते उपरांत न्युझिलंडाचो डाव 17.2 ओव्हरींत 92 धांवड्यांत सोपलो. 3 विकेटी घेवपी इफ्तिकार अमहमद प्लेयर ऑफ दी मॅच थारलो.
शाहीन आफ्रिदीन टॉस जिखून पयलीं बॅटिंग करपाचें थारायलें. ओपनर हसीबुल्लाह खानान टी-20 त पदापर्ण केलें मात तो शून्याचेर आवट जालो. महम्मद रिजवान आनी बाबर आझमान हांणी 53 धांवड्यांची भागिदारी केली. बाबरान 24 बॉलांत 13 धांवड्यो करून तो आवट जालो. ताका इश सोदीन कॅच आवट केलें. 10 ओव्हरींत पाकिस्तानाच्यो दोन विकेटी पडल्यो. स्लो खेळपट्टेर धांवड्यो करपाक बॅट्समनांक कुस्तार जातालें. मात फकर जमानान 16 बॉलांत 4 सके मारून फास्ट 33 धांवड्यो केल्यो. ताका निमाणे टीम सावदीन आवट केलें. रिजवान 38 बॉलांत 38 धांवड्यो करून आवट जालो.
फकर आवट जातगीर पाकिस्तानाच्या विकेटी एकफाटल्यान एक अश्यो पडत गेल्यो. मोहम्मद नवाज (1), इफ्तिकार अहमद (5) आनी शाहीन आफ्रिदी (1) सवाय भितर आवट जाले. पाकिस्तानाचो स्कोर 7 आवट 114 जाल्लो. तेन्ना साहिबजादा फरहानान 19 आनी अब्बास आफ्रिदीन 6 बॉलांत 14 धांवड्यो करून पंगडाक 130 धांवड्यो करून दिल्यो. पाकिस्तानान 20 ओव्हरींत 8 विकेटी वोगडावन 134 धांवड्यो केल्यो. न्युझिलंडाच्या टीम सावदी, मॅट हेन्री, लॉकी फर्गुसन आनी इश सोदीन देरकी 2 विकेटी घेतल्यो.
न्युझिलंडाची लेगीत सुरवात बाबत जाली.रचिन रवींद्र मोहम्मद नवाजान एक धांवडेर कॅच आवट केलो. फिन एलन (22), टीम सायफर्ट (19), विल यंग (12) आनी मार्क चापमन (1) फटाफट आवट जाले. 4 आवट 54 अशे स्थितींत ग्लेन फिलिप्सान पंडाचो डाव साल्वार करपाचो यत्न केलो. मात 26 धांवड्याचेर ताका शाहीन आफ्रिदीन आवट केलो. तो आवट जातगीर न्युझिलंडाचो डाव गडगडलो. कॅप्टन मिचेल सेंटनर (4), मॅट हॅन्री (1), इश सोदी (1), टीम सावदी (4) आवट जाले. फर्ग्यूसन शून्यार आवट जालो. 17.2 ओव्हरींत 92 धांवड्यांत न्युझिलंडाचो डाव सोपलो. पाकिस्तानाच्या इफ्तिकार अहमदान 24 धांवड्यांत 3 विकेटी घेतल्यो. मोहम्मद नवाज आनी शाहीनान दरेकी 2 विकेटी घेतल्यो, जमान खान आनी उसामा मीराक एकेक विकेट मेळ्ळी.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
