भांगरभूंय | प्रतिनिधी
भांगरभूंय । खेळां मेज
वास्कोः स्पोर्टिंग दी गोवाक निमण्या पांच मिनटांत घेवच्या पडल्ल्या गोलाक लागून आय लीगच्या दुसऱ्या विभागील लीग सर्तींत आयतारा वास्को टिळक मैदानार जाल्ले सुदेवा दिल्ली एफसी आड 1-1 गोल बोरोबोरींत खोस मानची पडली. स्ट्रायकर मार्क कार्व्हालोन स्पोर्टिंगाक सुरवेक आघाडी मेळोवन दिवपी गोल केल्लो. सुदेवाचो कॅप्टन आश्रय भारद्वाज हाणे 85 मिनटाक गोल बोरोबोरी करपी गोल केलो.
स्पोर्टिंगान खेळाची सुरवात बरी केली. हालींच पंगडांत धेतिल्ल्या कार्व्हालोन तीन मिनटांत पंगडाचो पयलो गोल केलो. लॉयड कार्दोजान दावे बगलेंतल्यान बॉल क्रॉस दिलो. कार्व्हालोन ताचे ताबो मेळोवन गोलकी आशिष सिबीक वेळ दिनास्तना बॉलांत गोल पोस्टांत धाडलो. सुरवेकूच गोल पडल्ल्यान सुदेवाची पंगडांत हुस्को जाल. पूण तांणी खेळांत सुदारणा केली. बॉलाचेर चड वेळ ताबो दवरून स्पोर्टिंगाक बॅकफूटार धाडलें. श्रीदातव नोंगमेयाकापाम आनी श्लोक तिवारीन गोल करपाचे यत्न केले. मात स्पोर्टिंगचा गोलकी भास्कर जल्मी ते फळादीक जावपाक दिले नात.
दुसऱ्या सत्रांत दोनूय पंगडांच्या गोल करपाच्या संद येसस्वी जावपाक शकल्यो नात. लायडाक गोल करपाची भांगरा संद आशिल्ली. बॉक्सांत मेळल्ल्या पासाचेर ताणे बॉलाचेर फटको मारपाक मात्सो वेळ लायलो आनी गोल करपाची संद वोगडायली. दुसऱ्या सत्रांत स्पोर्टिंगाचो कोच आर्मांद कुलासोन कांय बदल केले आनी अणभवी मार्कस मस्कारेन्हासाक आक्रमण फळेंत हाडलें. विदिप्त दुवान उजवें फ्लँकची जापसालदारी सामाळली. लायडान मदले फळेंतले काम केलें. ताणे मस्कारेन्हासाक बरो क्रॉस दिल्लो पूण तो गोलकीक फटोवपाक शकलो ना. उपरांत लॉयडान रोहन रॉड्रिग्जाक पास दिलो, पूण ताणे शॉट मारपाचें सोडून वांगड्याक तो पास केलो.
निर्धारीत वेळ सोपपाक पांच मिनटां आसताना सुदेवान बोरोबोरी करपी गोल केलो. स्पोर्टिंगाचो गोलकी भास्कर जल्मी हांका बॉलाचेर नीट नियंत्रण मेळोवपाक मेळ्ळें ना आनी सुदेवाचो कॅप्टन आश्रय भारद्वाजान हेडरान बॉलांक गोल रिंगणाची दिका दाखली आनी स्पोर्टिंगाचें जैत झोमून घेतलें. स्पोर्टिंगाची फुडली मॅच 27 जानेवारीक टिकळ मैदानार केंकरे एफसी आड जातली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
