भांगरभूंय | प्रतिनिधी
रस्तो खणिल्ल्यान लोक खुबळ्ळ्यात, आदले वरी करून दिवपाची मागणी
भांगरभूंय । प्रतिनिधी
वास्कोः लोकांचें येवप- वचप चालू आशिल्लो रस्तो खणिल्ल्यान रेल्वेच्या कंत्राटदारा आड वेळसांवच्या कांय लोकांनी निदर्शनां केलीं. तो रस्तो आदलेवरी पूर्वरत करचो, अशी तांणी मागणी केली.
तो रस्तो खणटले अशी कसलीच पूर्वसुचोवणी कंत्राटदार वा अधिकारी वर्गान दिवंक ना. ह्या प्रकरणांत संबंदीत सरकारी यंत्रणे कडेन कागाळी केल्यात, अशों गोंयचो एकवोटचे ओर्वील दोरादो हांणी सांगलें. आमकां धमक्यो येतात, पूण आमी भियेनात. आमी ओगी बसचे नात. वेळ आयल्यार गोंयांतल्या हेर संघटणांक वांगडा घेवन आमी रस्त्याचेर देंवतले, अशीय शिटकावणी तांणी दिली.
वेळसांवच्या लोकांचो रेलमार्ग दोट्टीकरणाक आनी रेल्वेंतल्यान जावपी कोळसो येरादारीक विरोध आसा. हे आदींय थंयच्या लोकांनी आंदोलनां केल्लीं. फाटल्या कांय म्हयन्यां सावन तें आंदोलन थंड जाल्लें, पूण रेल्वेच्या कंत्राटदारान प्रिमोरोवाडो वेळसांवचो रस्तो खणिल्ल्यान थळावे लोक खुबळ्ळ्यात. रस्तो खणिल्ल्यान तांची धांदल जाल्या. तांकां त्या गाडयो व्हरपाक मेळना. ह्या प्रकरणांत थळाव्या लोकांनी शेनवारा एकठांय येवन आंदोलन केलें. आमकां कोळसो, रेलमार्ग दोट्टीकरण नाकाच, अश्यो तांणी घोशणा दिल्यो.
त्या रस्त्याचेर रेल्वेचो कसलोच अधिकार नासतना तशेंच ते सुवातेचे सगळे दस्तावेज आपल्या कडेन आसतना रेल्वेच्या कंत्राटदारान थंयचो रस्तो खणला. हे आदींय रेल्वेन थंय पावसाच्या उदकाची वाट बंद केल्ली. कोळसो येरादारीक लागून सगळे कडेन कोळशाचो पिठो दिश्टी पडटा, असो दावो लोकांनी केला. ते जमनीचेर रेल्वेचो कसलोच अधिकार ना. रेल्वे कंत्राटदारान थंयचे जमनीर अतिक्रमण केलां. थंय रेलमार्ग दोट्टीकरणा खातीर ती वाट बंद करपाचें कारस्थान रेल्वे खेळटा, असो दावो दोरादो हांणी केला. ह्या प्रकरणांत कुठ्ठाळीचे आमदार आंतोनियो वास हांणी लक्ष दिवचें, ना जाल्यार फुडले पिळगे खातीर तो कोळसो, दोट्टीकरण घातक थारतलें, अशेंय तांणी सांगलें.
कोळसो थेट कर्नाटकांत देंवयातः एलिना साल्ढाणा
लोकप्रतिनिधीन हे सुवातेर येवन प्रत्यक्ष पळोवणी करपाची गरज आसा. ह्या वाठारांतल्या घरांक वेंरो गेल्यात. व्हड प्रमाणांत कोळसो येरादारी करचे खातीर रेममार्गाचें दोट्टीकरण करतात. ऑस्ट्रेलिये सावन मुरगांव बंदरांत येवपी कोळसो खंय वता? तो कर्नाटकांतल्या कंपनीं खातीर वापरतात. ताका लागून तो कोळसो थंयच्या बंदरांत देंवोवपाक जाय. आयज दक्षीण गोंयांत कोळशाचें प्रदुशण जाता म्हूण उत्तर गोंयांतले लोक ओगी आसात. फुडारांत उत्तर गोंयांतूय कोळशाचें प्रदुशण जातलें, हें तांणी मतींत दवरचें. मानवी जीण, पर्यावरण, घरां सांबाळात, असो उलो आदली मंत्री एलिना साल्ढाणा हांणी मारलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
