भांगरभूंय | प्रतिनिधी
86वे टाटा स्टील सुपर ग्रॅण्ड मास्टर्स बुद्दीबळ सर्तीतले सवे फेरयेंत भारताचो ग्रॅण्डमास्टर डी गुकेशान आनीक एक जबरदस्त जैत जोडून पुनरागमन केलें. तिसरे आनी चवथे फेरयेंत हारल्या उपरांत गुकेशान पांचवे फेरयेंत संवसारीक बुद्दीबळ चॅम्पियनशिपीचो दोन खेपेचो चॅलेंजर यान नेपोमनिशीक हारयिल्लो. ते उपरांत सवे फेरयेंत नॅदरलॅण्डाच्या जॉर्डन वान फॉरेस्टा हारोवन किताबाचे रेसींत आपल्याक कायम राखलो.
काल्या घुलांनी खेळपी गुकेशान स्कॉच ओपनिंगेंत आक्रमक रितीन खेळ करीत 45वे चालींत जैत जोडलें.
मजगतीं, भारताचो आनीक एक ग्रॅण्डमास्टर आर प्रज्ञानंदान रशियेच्या नेपोमनिशीक बरोबरीत आडायलो जाल्यार विदीत गुजराती आनी बायल गटांतली बुद्दीबळ वस्ताद चीनाची जू वेंजून हिचे मदलो डाव लेगीत बादाबाद रितीन सुटलो.
फ्रान्साच्या अलिरेझा फिरौझान चीनाच्या वे यी हाका हारयलो, जाल्यार नॅदरलॅण्डाच्या मॅक्स वार्मेर्दनान जर्मनीच्या अलेक्झेंडर दोनचेंकोक हारयलो.
स फेरयां उपरांत अनीश गिरी 4.5 गुणां सयत पयले सुवातेर आसा. अलिरेझा 4 गुणां सयत दुसरे, जाल्यार डी गुकेश आनी प्रज्ञानंद, अब्दुसत्तोरोव, डिंग लिरेन आनी मॅक्स हांचे 3.5 गूण आसात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
