भांगरभूंय | प्रतिनिधी
गोंय आनी मंगळुराक खंयची गजाल लागीं हाडटा वा दोनूय प्रदेशांतलें नातें घटमूट करता अशें दिसता?
संगीत आमकां लागीं हाडटा. म्हाका स्वता गोंयचीं कोंकणी गितां आवडटात आनी आमचीं कितलींशींच कोंकणीं गितां गोंयच्या लोकांक आयज मेरेन आवडटात. काजरांनी आमी गोंयचीं कातारां आनी गितां सादर करतात. तशेंच हांगां गोंयचे संगीत पंगड येवन सादरीकरण करतात. आमचेय संगीतकार गोंयांत वचून आपली कला लोकां मुखार दवरतात. म्हज्या ‘ला विडा’ ह्या संगीत आल्बमा वेळार तर गोंयचे संगीतकार मुकेश घाटवळ आनी गीतकार संजय बोरकार हांणी योगदान दिलां. हे खातीर म्हाका दिसता गोंयचें आनी मंगळूराचें नातें संगीत घटमूट करता. तशेंच आमचे कोंकणी भाशेनय आमकां लागीं दवरल्यांत. म्हाका क्रिस पेरी आनी सोनिया शिरसाटाचीं पदां खूब आवडटात.
शिल्पाबाय, आयज मेरेन तुमकां जें येस मेळ्ळां ताचें स्रय तुमी कोणाक दितात आनी कित्याक?
संगीत मळार योगदान दितना खूब बऱ्या व्यक्तींक मेळपाची संद मेळ्ळी. बऱ्या- बऱ्या लोकां वांगडा काम करपाक मेळ्ळें. सगळ्यां कडेन शिकपाची संद मेळ्ळी आनी हातूंतल्यान येस मेळोवपाक सोंपें जालें. पूण, सगळ्यांत पयलीं देवाचें उपकारी. देवाचे सासायेन हांव आयज मेरेन गायतां. भक्तीगीतां गायतना म्हाका खूब सकारात्मकता मेळटा आनी तातूंतल्यान एक नवी उर्जा तयार जाता. जयपूर घराण्याची गायिक सर्गेस्त वासंती आर. नायक हांचे कडल्यान खूब शिकपाक मेळ्ळें. येसाचीं सोंपणां चडटना म्हजे भितर कसलोच अहंकार येवचो न्हय हाचीय शिकवण तिणें म्हाका दिली. म्हजे खातीर ती एक गुरू, इश्टीण आनी माया दिवपी आवय आशिल्ली. तशेंच पटियाला घराण्यांतले मणी सिंह राजपूत हांचेंय मार्गदर्शन मेळ्ळां.
कोंकणी पदां गायतना मनाक कितली धादोसकाय मेळटा? आनीक आमची कोंकणी भास आनी संगीत तिगोवन दवरपा खातीर कितें करपाक जाय अशें दिसता?
आमी सगळ्यांनी एक मान्य करपाक जाय तें म्हणल्यार आमची कोंकणी भास ही खुबूच सुंदर, म्होंवाळ आसा. कोंकणी पदां गायतना म्हाका एक भक्तीमय आनंद मेळटा, मागीर ती स्टुडियोंत गायतना आसूं वा माचयेर. हांव खूब आनंद लुट्टां. कोंकणी पदां गायतना खूब अभिमान दिसता. कित्याक तर ती आमची भास आनी ते खातीर त्या पदांतले भाव आमी बरे तरेन लोकां मेरेन पावोवपाक शकतात. तुमच्या दुसऱ्या प्रस्नाची जाप दितना हांव अशें सांगन की आतां हें खूब शक्य आसा, कित्याक तर आमचे कडेन सोशल मिडिया आसा. त्याच बरोबर आमी नव्या संगीतकारांक, गायकांक आनी कलाकारांक माची दिवन तांकां उर्बा दिवपाची गरज आसा. अशें केल्यार आमची भास आनी संगीत सदांच आमचे मदीं उरतलें.
अमूकच अशा गायका वांगडा गावपाची इत्सा बी आसा?
हांवें मंगळूरांत चडशा गायकां वांगडा गायन केलां. फकत आमचे संगीतकार सर्गेस्त विल्फी रेबिम्बस हांचे वांगडा काम करपाची उमेद आशिल्ली. गोंयची गायिका सोनिया शिरसाट हांचीं खूब पदां आयकल्यांत. तांच्या वांगडा केन्नाय गावपाक मेळ्ळ्यार खूब मजा येतली.
तुमी कितल्या भासांनी गितां गायल्यांत आनी तीं कितलीं आसतलीं?
हांवें आतां मेरेन कोंकणी, कन्नड, तुळू, हिंदी आनी इंग्लीश भाशेंत गितां गायल्यांत. सिनेमांनी बी धरून अशीं आतां मेरेन 400 गितां गावपाची संद म्हाका मेळ्ळ्या.
तुमच्या घराण्यांत गायनाची परंपरा आशिल्ली? काय तुमकां स्वता जावन आवड तयार जाली?
आमच्या घराण्यांत गायनाची परंपरा नाशिल्ली. हांव सुटयांनी आमच्या सोयऱ्यांगेर रावपाक वतालें. तेन्ना तांच्या एका इश्टा कडेन कितलींशींच कोंकणी गितां आशिल्लीं. तांचे कडल्यान हांव पयले फावट विल्फी रेबिम्बस हांचें गीत शिकलें. पूण तेन्ना हांवें गायनाची गजाल गंभीरतायेन घेवंक नाशिल्ली. मागीर एक दीस कोंकणी नाटकसभा हांणी आयोजीत केल्ले गायन सर्तीत वांटो घेवपाची संद मेळ्ळी आनी थंयच्यान म्हाका संगीत शिकपाची उमेद जाली. यत्ता तिसरेक आशिल्लें तेन्ना म्हाका ही संदी मेळिल्ली. ते उपरांत हांव शिकत गेलें. सातवेक आशिल्लें तेन्ना म्हाका संदेशा कालोत्सव आनी कला संगम संघटनांचे पुरस्कार फावो जाले. ते उपरांत म्हाका पयले फावट एका संगीत कॅसेटींत गावपाची संद मेळ्ळी आनी म्हजो गायनाचो प्रवास सुरू जालो.
तुमकां गायनाची उर्बा कोण दिता?
म्हजी गितां आयकुप्यांनी म्हाका खूब उर्बा दिल्या. तांणी तोखणाय करतकच आनीक गायन दिसता आनी अशे तरेन ही उर्बा म्हाका मुखार सरपाक मदत करता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
