भांगरभूंय | प्रतिनिधी
कर्नाटकाच्या म्हैसुरांत चालू आशिल्ले चार दिसांचे रणजी करंड लडतीच्या दुसऱ्या दिसाचे अखेर मेरेन येजमान कर्नाटक पंगडान गोंयच्या पयल्या डावांतल्या 321 धांवड्यांक 4 बाद 252 अशी जाप दिली.
एसडीएनआरडब्ल्यू स्टेडियमाचेर चालू आशिल्ले हे लडतींत कर्नाटका खातीर देवदत्त पडिक्कल आनी मुखेली मयांक अगरवाल हाणें शेंकडे मारले. देवदत्तान 142 बॉलांनी 13 चवक्यांचे मजतीन 102 धांवड्यो केल्यो, जाल्यार अगरवालान 180 बॉलांनी 114 धांवड्यो केल्यो. ताणें 10 चवके मारले.
दोगांयनी मेळयिल्ल्या जीनवदानाचो पुर्णपणान फायदो करून घेतलो. दर्शन मिशाळ आनी मोहीत रेडकार हांचे बॉलिंगेचेर गोंयच्या फिल्डरांनी वट्ट पांच जाल्यार फॅलिक्स आलेमांवचे बॉलिंगेचेर एक कॅच सोडली. पडिक्कलाच्यो चार कॅची सोडल्यो. अगरवाल आनी पडिक्कल हांणी दुसरे विकेटी खातीर 209 धांवड्यांची भागिदारी केली.
गोंयचे फास्ट बॉलर परतून एकदा तिसरे मॅचींत अपेशी थारले. अर्जुन तेंडुलकर ह्या हंगामांत बॅटिंगेचेर चड भर दितना दिसलो. ताचे बॉलिंगेंत वेग, अचुकताय आनी आक्रमकातेचो उणाव दिसून आयलो. तशेंच फॅलिक्स आलेमांव आनी हेरंब परब हे फास्ट बॉलर लेगीत अपेशी थारले. अशे फाटभुंयेर विकेटी मेळोवपाची सगली जापसालदारकी अणभवी दर्शन मिशाळ आनी मोहीत रेडकार हांचेर आयली. तांणी दरेकी दोन विकेटी घेतल्यो. ह्या दोगांचे बॉलिंगेचेर गोंयच्या फिल्डरांनी कॅची धरिल्ल्यो जाल्यार कर्नाटकाचो डाव कालूच सोंपतलो आसुये. तिसऱ्या सत्रांत 49 बॉलांनी कर्नाटकाच्यो तीन विकेटी पडल्यो.
ते पयलीं 8 बाद 228 धांवड्यां वयल्यान मुखार खेळटना गोंयान 321 धांवड्यां मेरेन मजल मारली.
अर्जुन तेंडुलकर आनी हेरंब परब हाणें अर्द शेंकडे नोंदयले. तेंडुलकरान 112 बॉलांनी 52 धांवड्यो केल्यो. ताणें चार चवके आनी एक सको मारलो, जाल्यार हेरंबान 81 बॉलांनी 53 धांवड्यो केल्यो. हातूंत आठ चवक्यांचो आनी एका सक्याचो आस्पाव आशिल्लो. ह्या दोगांयनी णववे विकेटी खातीर 93 धांवड्यांची म्हत्वाची भागिदारी केली.
कर्नाटका खातीर एस व्यंकटेश, व्ही वैशाख आनी रोहीत कुमार हांकां दरेकी तीन आनी व्ही कौशिकाक एक विकेट फावो जाली.
धांवतकटोः गोंय (पयलो डाव) 8 बाद 228 धांवड्यां वयल्यान 110.1 ओव्हरींनी सगले बाद 321 धांवड्यो ( अर्जुन तेंडुलकर कॅ. शरथ बॉ. व्यंकटेश 52, हेरंब परब बो. बॉ. एम व्यंकटेश 53, फॅलिक्स आलेमांव नाबाद 3, अतिरिक्त 24.
बॉलींगः व्ही कौशिक 26-8-49-1, व्ही वैशाख 25-5-76-3, एम व्यंकटेश 19.1-3-41-3, रोहीत कुमार 29-5-90-3, शुभांग हेगडे 8.1-6-28-0, मयांक अगरवाल 2-0-13-0.
कर्नाटक, (पयलो डाव) डी निश्चल एलबीडब्ल्यू बॉ. दर्शन मिशाळ 16, मयांक अगरवाल कॅ. इशान गडेकार बॉ. दर्शन मिशाळ 114, देवदत्त पडिक्कल कॅ. दर्शन मिशाळ बॉ. मोहीत रेडकार 102, एस जे निकीन जोस खेळटा 3, रोहीत कुमार कॅ. समर दुभाषी बॉ. मोहीत रेडकार 2, एस शरथ खेळटा 0, अतिरिक्त 15.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
