भांगरभूंय | प्रतिनिधी
हडफड्यां हिंदू- क्रिस्तांव भावांच्या एकवटाचें प्रतीक
भांगरभूंय । खबरां मेज
पणजीः हिंदू- क्रिस्तांव हांचे मदलो एकवट दाखोवपी हडफडें गांवचें सेंट सेबॅस्तियन फेस्त उमेदीन मनयलें.
खूब वर्सां सावन हे कपेल पुराय गोंयांत हिंदू आनी क्रिस्तांव हांच्या एकवटाचें प्रतीक आसा. ही संस्कृती अशीच मुखार चालू उरची, अशी आपूण देवाक कडेन प्रार्थना करतां, अशें कळंगूटचे आमदार मायकल लोबो हांणी सांगलें. ते ह्या फेस्ता निमतान आयिल्ले, त्या वेळार उलयताले.
दर वर्सा 20 जानेवारीक हडफडें गांवांतल्या तिठ्यार आशिल्ल्या सेंट सेबॅस्तियन कपेलांत फेस्त मनयतात. ह्या वेळार गांवांतले सगळे हिंदू आनी क्रिस्तांव भाव एकठांय येवन प्रार्थना करतात, देवाक फुलांचो हार घालतात, मेणवाती पेटयतात.
हडफडें गांवच्या लोकांचीं सोयरी मुजरत गांवांतलो एकवट पळोवपाक ह्या फेस्ताक येतात. त्या दिसा गांवांतल्या दरेका हिंदू वा क्रिस्तांव भावांच्या घरांत सान्ना आनी रोस मुजरत करतात, अशी म्हायती हडफडें- नागवाचे सरपंच रोशन रेडकार हांणी दिली.
जात्रे वरी ह्या फेस्ताक खेळण्याचीं दुकानां, शितपेयांची दुकाना, चणें- भिकणां, फुलां- फळां विक्रेते येतात. ह्या कपेलाचो इतिहास पळयत जाल्यार गांवांतल्या जाण्ट्यां कडल्यान कळटा, प्राचीन काळार थंय श्री देव सत्पुरुशाचें देवूळ आशिल्लें. पुर्तुगेज राजवटींत तें देवून नश्ट केलें आनी थंय हें कपेल बांदलें. तेन्नाच्या गांवांतले हिंदू आनी क्रिस्तांव भाव ह्या कपेलांत व्हड उत्सव जावचो ह्या उद्देशान दर वर्सा 20 जानेवारीक फेस्त मनयतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
