भांगरभूंय | प्रतिनिधी
श्रीपाद नायकः लाखां परस चड मतां मेळपाचो दावो
भांगरभूंय । प्रतिनिधी
मुरगांवः येता ते लोकसभा वेंचणुकेंत उत्तर गोंयांत भाजपा एक लाखां परस चड मतांनी वेंचून येतलों, असो विस्वास केंद्रीय राज्य बंदर, उदका मार्ग, पर्यटन मंत्री तशेंच उत्तर गोंय खासदार श्रीपाद नायक हांणी सांगलें.
अंदूं गोंयांत भाजपा दोनूय सुवातांचेर भोवमतान जिखून येतलो. 22 जानेवारीक भारत देशा खातीर भांगरा महोत्सवी वर्स आसा. प्रभू श्रीराम प्रत्यक्ष धर्तरेर अवतरतले. 1991- 92त अयोध्येंत कार सेवक म्हूण वावर केला, ताचें फळ मेळिल्ल्याची खोस जाता, अशें मंत्री नायक हांणी सांगलें.
मुरगांव सड्या वयल्या आंबेडकर वेवसायीक केंद्रांत, एमपीटी आयोजीत 33व्या अखील बंदर बुद्धीबळ सर्तीच्या इनामां भेटवण सुवाळ्यांत मुखेल सोयरे म्हूण मंत्री नायक उलयताले. तांचे वांगडा एमपीए अध्यक्ष डॉ. एन. विनोद कुमार, उपाध्यक्ष गुरुप्रसाद राय, एमपीए खेळां सचीव मिलिंद देसाय, एमपीए खेळां मुखेली कॅप्टन मनोज जोशी, बुद्धीबळ मार्गदर्शक वसंत नायक, मुरगांव म्हाल बुद्धीबळ संघटणेचे अध्यक्ष किशोर बांदेकार, एमपीए खेळां भांडारी धिरज नार्वेंकार आनी हेर मानेस्त हाजीर आशिल्ले.
सर्तींतलें पयलें इनाम एमपीटी बुद्धीबळ पंगड (25 गूण), दुसरें इनाम मुंबय पोर्ट ट्रस्ट आनी तिसरें इनाम विशाखा पट्टनम पोर्ट ट्रस्ट हांकां फावो जालें. वट्ट 9 पंगडांनी सर्तींत वांटो घेतिल्लो. ह्या वेळार पत्रकारां कडेन उलयतना केंद्रीय मंत्री नायक हांणी सांगलें, भाजपा अंदूं उत्तर गोंयांत लोकसभा वेंचणुकेंत भोवमतान जिखतलो. उत्तर गोंयांतल्या मतदारांनी पांच खेपे आपल्या सारक्या सामान्य कुटुंबांतले व्यक्तीचेर विस्वास दवरून खासदार म्हूण वेंचून हाडला. गोंयची उदरगत म्हणल्यार प्रधानमंत्री नरेंद्र मोदी. गोंयांतल्या दोनूय सुवातांचेर भाजपा निश्चीत जिखतलो, अशें केंद्रीय मंत्री नायक हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
