भांगरभूंय | प्रतिनिधी
सुभाष शिरोडकारः मुळाव्या कृशी पतसंस्थांक भेटयली कंप्युटर हार्डवेर प्रणाली
भांगरभूंय । डीआयपी
पणजीः दर गांवांत मुळावी कृशी पतसंस्था आसपाक जाय, अशें सहकार मंत्री सुभाष शिरोडकार हांणी सांगलें. शुक्रारा गोंयांतल्या मुळाव्या कृशी पतसंस्थांक कंप्युटर हार्डवेर प्रणालीच्या वितरण कार्यावळींत ते उलयताले.
गोंयांतल्या मुळाव्या कृशी पतसंस्थांक कंप्युटर हार्डवेर प्रणालीचें वितरण करचे खातीर केंद्रीय सहकार मंत्रालय आनी गोंय सरकाराच्या सहकार खात्यान शुक्रारा पाटो पणजे सहकार संकुलांत कार्यावळीचें आयोजन केल्लें.
गांवांतल्लया लोकांचे उदरगती खातीर मुळाव्यो कृशी पतसंस्था म्हत्वाचें योगदान दिवपाक शकता. विकसीत गोंय 2037 ची मोख पुराय करचे खातीर सरकार नेटान काम करता. ते खातीर सहकारी संस्थांचो आदार म्हत्वाचो आसा, अशें शिरोडकार हांणी सांगलें.
गोंय राज्य सहकारी बँकेचे अध्यक्ष उल्हास फळदेसाय हांणी सांगलें, ‘सहकार से समृद्धी’ हें प्रधानमंत्री नरेंद्र मोदी हांचें सपन प्रत्यक्षांत हाडचे खातीर सहकारी संस्थांनी सक्रीय योगदान दिवचें. कंप्युटर हार्डवेर प्रणालीक लागून कृशी पतसंस्थांचे सेवेंत सुदारणा जावपाक मजत जातली.
नॅशनल बँक फॉर रुरल डॅव्हलॉपमेंटाचे (नाबार्ड) उपवेवस्थापक विश्वास कदम हांणी मुळाव्या कृशी पतसंस्थांचे सेवेंत कार्यक्षमता आनी पारदर्शकता हाडपा सयत संस्थांचो फायदो वाडोवपा खातीर कंप्युटर हार्डवेर प्रणालीची मजत जातली, अशें सांगलें. सहकार निबंधक अरविंद बुगडे हांणी येवकार दिलो. उपनिबंधक सीताराम सावळ हांणी उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
