भांगरभूंय | प्रतिनिधी
भांगरभूंय । प्रतिनिधी
पर्वरीः केंद्रीय पर्यटन राज्यमंत्री श्रीपाद नायक हाणे खासदार निधींतल्यान रेईश मागुश आनी नेरूल पंचातीक दिल्ली हर्स व्हॅन (मडी व्हरपाचें वाहन) फाटल्या अडेज म्हयन्या सावन वेरें हांगा वीज खात्याच्या कार्यालया सामकार पडून आसा. हे व्हॅनीचें येरादारी खात्यांत रजिस्ट्रेशन करूंक नाशिल्ल्यान ती वापरपाक मेळना. सुमार 35 लाख रुपये खर्च करून श्रीपाद नायक हाणे ही व्हॅन घेवून फाटल्या 15 नोव्हेंबराक पंचायतींक दिल्ली.
रेईश मागुश पंचायत वांगडी सुभाष पेडणेकार हाका हे व्हॅनी संबंदी विचारलें तेन्ना तिचें रजिस्ट्रेशन करपाची जापसालदारी बार्देशच्या उपजिल्होधिकाऱ्याची आसा. पंचायत मंडळान व्हॅन चलोवपाक ड्रायव्हर घेवपाचो थाराव पास केला अशी म्हायती ताणे दिली. हे हर्स व्हॅनीचें अजून रजिस्ट्रेशन केलें ना हे कळटगीर आपल्याक धपको बसलो अशें साळगांवचो आमदार केदार नायकान सांगलें. व्हॅनीच्या रजिस्ट्रेशना खातीर जाय आशिल्लो एक दस्तावेज पंचायतीत दिलो ना ताका लागून रजिस्ट्रेशन अडून पडलां असो स्पश्टिकरण उपजिल्होधिकाऱ्यान आपल्याक दिलां. संबंदीत दस्तावेज दिवपाक आपणे रेईश मागुश पंचायत मंडळाक सांगलां. ही व्हॅन दवोरपा खातीर बेती फेरी धक्क्या लागीं वेगळी शेड बांदतले अशेंय ताणे सांगलें.
इतली म्हारक हर्स व्हॅन हाडून तिचो उपेग करनास्ता दवोरपाच्या प्रकारा खातीर समाज वावुरपी राजेश दाभोलकारान तिडक उक्तायल्या. रेईश मागुश पंचायत मंडळाक फुकट मेळल्ल्या हे व्हॅनीचें कांय पडून गेल्लें ना. तिचें रजिस्ट्रेशन करपा कडेन आडनदर करप म्हणल्यार पंचायत मंडळाचें घाळपण अशें ताणे सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
