भांगरभूंय | प्रतिनिधी
भांगरभूंय । प्रतिनिधी
फोंडेंः करंजाळ- मडकय हांगच्या श्रीमती आनंदीबाई महानंदू नायक हायस्कुलाचें वर्सकी स्नेहसंमेलन व्हडा दबाजांत जालें. मुखेल सोयरो म्हणून वीज मंत्री सुदिन ढवळीकार हाजीर आशिल्ले. मडकयचो सरपंच शैलेंद्र पणजीकर, उपसरपंच संध्या नीलेश नायक, पंच वांगडी विशांत नायक, हायस्कलू वेवस्थापन समितीचो अध्यक्ष अध्यक्ष श्याम महानंदू नायक ,सचीव उमेश नायक, व्यवस्थापक दिनेश नायक, मुख्याध्यापक भारत उर्फ उमाकांत नायक, पालक शिक्षक संघाचो अध्यक्ष नीलेश भोलू नायक, प्राथमिक शाळेच्या पालक शिक्षक संघाचो अध्यक्ष सुदिन नायक, विशिता सरनायक, गोविंद नायक , सदानंद फडते माचयेर आशिल्ले.
हायस्कुलाच्या धावे परिक्षेचो निकाल सेगीत आठव्या फावट शंबर टक्के लागिल्ले खातीर सुदिन ढवळीकार हांणे मुख्याध्यापक, शिक्षक आनी विद्यार्थ्यांची तोखणाय केली. निकालाची ही परंपरा अशीच चालू दवोरपाचें आवाहन केलें. नवें शिक्षणीक धोरम विद्यार्थ्यांचे कुशळतायेक वाव दिवपी आसा अशें ताणे सांगलें. सरपंच शैलेंद्र पणजीकारान सांगलें की प्राथमीक विद्यालयाची सुसज्ज वास्तू गोदरेज कंपनीन बांदून दिल्ल्यान भुरग्यांची बरी वेवस्था जाल्या. ग्रामपंचायती वतीन फुडाराक शाळेक सहकार्य करतले अशें ताणे सांगलें.
शिक्षक विद्यार्थ्यांचो मार्गदर्शन करपी इश्ट आसता. तो चारित्र्यवान, शिलवान आनी आदर्श आसपाक जाय अशें श्याम नायक हाणे सांगलें. ह्या वेळार शाळेचो निवृत्त कर्मचार गंगाराम नायक हाचो ढवळीकाराचे हस्तुकीं भोवमान केलो. शाळेची आदर्श विद्यार्थीनी म्हणून अन्वेषा गावडे हाचो भोवमान केलो. आर्यन नीलेश नायक हाचो सम्राट विद्यार्थी पुरस्कार भेटोवन भोवमान केलो. वेगवेगळ्या सर्तींनी जैतिवंत जाल्ल्यांक मानेस्तांचे हस्तुकी इनामां भेटयली. उमेश नायक हाणे सोयऱ्यांची वळख करून दिली. भारत नायक हाणे अहवाल सादर केलो. विद्यार्थ्यांनी मनरिजवणेच्यो कार्यावळी सादर केल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
