भांगरभूंय | प्रतिनिधी
नवी दिल्ली, खबरां संस्था ः भलायकी सेवा महासंचालनालयान भारतातल्या सगळ्या फार्मासिस्ट असोसिएशनांक अँटीबायोटीक्स वखदां संबंदी पत्र बरयलां. हातूंत फार्मासिस्टांक दोतोराच्या प्रिस्क्रिप्शना बगर अँटीबायोटीक्स वखदां दिवचीं न्हय असो उलो मारला.
देशांत अँटीबायोटीक्स वखदांचो वापर दिसान दीस वाडत आसा आनी तो मनशाचे भलायकेक खूब हानीकारक थारता. हें मतींत दवरून हो निर्णय घेतला. केंद्रीय भलायकी मंत्रालयान वैजकी म्हाविद्यालयां आनी वैजकी संघटणांतल्या सगळ्या दोतोरांनी अँटीबायोटीक्स वखदां दितना कारण सांगप सक्तीचें केलां.
2019 वर्सा सुमार 13 लाख लोकांक मरण…
संवसारीक पांवड्यार भौशीक भलायकेक जावपी एक मुखेल धोको म्हळ्यार सुक्ष्मजंतूनाशक प्रतिकारशक्त (AMR) अशें केंद्रीय भलायकी मंत्रालयाच्या पत्रांत म्हणलां. एका अदमासा प्रमाण 2019 वर्सा सुमार 13 लाख लोकांक मरण येवपाक बॅक्टेरियाचो AMR जापसालदार आशिल्लो. हाचे भायर वखदां प्रतिकारशक्तीच्या संसर्गाक लागून 50 लाख लोकांक मरण आयलां.
खरें म्हणल्यार विसाव्या शेंकड्याचे सुरवेक सोपें आनी ल्हान- ल्हान दुयेंसां लेगीत पयस करपाक खूब तेप लागतालो, पूण अँटीबायोटीक्स वखदां (अँटीबायोटीक्स, अँटीफंगल आनी अँटीव्हायरल वखदां) वापरिल्ल्यान दुयेंसांचेर रोखडेंच उपचार जावपाक लागले. देखून लोक अँटीबायोटीक्सचो चड वापर करपाक लागले.
भारताच्या वखदां कायद्या प्रमाण सगल्या प्रकारच्या अँटीबायोटीक्स वखदांक एच आनी एच 1 सारक्या श्रेणींत दवरलां. जे दोतोरांच्या प्रिस्क्रिप्शना बगर विकूंक मेळनात. अँटीबायोटीक्स वखदांची थेट दुकानांतल्यान विक्री बंद करून फकत पात्र दोतोरांच्या सुचोवणे प्रमाण विकपाक जाय अशेंय भलायकी सेवा महासंचालक डॉ. अतुल गोयल हांणी सांगलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
