भांगरभूंय | प्रतिनिधी
दिगंबर कामतः सगळ्यांक आराखडो दाखयत बसल्यार उदरगतीचीं कामां अशक्य
भांगरभूंय । प्रतिनिधी
मडगांवः मडगांवचो मास्टरप्लान तयार केला. आर्क्टीटेक्चर आनी इंजिनियर तशेंच तांत्रीक विभागांतले मनीस सोडून हेरांत मास्टरप्लान कळचो ना. पालिकेंतलें सादरीकरण नगरसेवकां सयत सगळ्यां खातीर उक्तें आशिल्लें. आराखडो सगळ्यांक दाखयत बसल्यार 50 ते 100 जाण वैयक्तीक अडचणी मांडीत बसतले आनी मास्टरप्लान केन्नाच तयार जावपाक शकचो ना. बदल करून अंतीम आराखडो तयार जालो जाल्यार ह्याच अर्थसंकल्पांत निधी दिवपाची मागणी करतलों, अशी म्हायती मडगांवचे आमदार दिगंबर कामत हांणी दिली. मास्टरप्लानाचें म्हत्व लोकांक कळचें हे खातीर कांय पायलट प्रकल्प आदीं हातांत घेतले, अशेंय तांणी स्पश्ट केलें. मडगांव शाराचो मास्टरप्लान तयार केला, हे संबंदांत विचारले उपरांत आमदार कामत हांणी सांगलें, मडगांव शाराचो मास्टरप्लान संबंदीत एजन्सी कडल्यान तयार केला. ही एजन्सी मडगांवां सयत फोंडें, वाळपय, वास्को ह्या शारांचो मास्टरप्लान तयार करतली. मडगांव नगरसेवकां वांगडा पालिका सभाघरांत सादरीकरण केल्लें. ते उपरांत शारांतल्या तांत्रीक मळा वयले जे मनीस आसात, तांचे वांगडा संवाद सादपाचो आशिल्ल्याचें एजन्सी वतीन सांगिल्ल्यान मडगांवच्या हॉटेलांत मास्टरप्लानाचें सादरीकरण दवरिल्लें. तांच्यो ज्यो कांय सुचोवण्यो आसात, त्यो आयकून घेतल्यो. ते उपरांत एजन्सी वतीन सांगलें, तांचो पंगड पणजे आसतलो. कोणाक कांय सुचोवण्यो करपाच्यो आसत जाल्यार थंय करच्यो, अशेंय कामत हांणी सांगलें.
मास्टरप्लान तीन दिसांनी सादर करतले
मास्टरप्लान आराखड्यांत जे कसले बदल आसतले, ते फुडल्या तीन दिसांनी करतले आनी आराखडो पणजी कार्यालयांत सादर करतले. अशें करूंक ना जाल्या मास्टरप्लान केन्नाच तयार करपाक जावचो ना. सध्या येरादारी विभागा कडेन संवाद सादून येरादारी वेवस्थापन बरें दवरचे खातीर गरजेच्यो सुचोवण्यो करतले.
पायलट प्रकल्प पयलीं घेतले हातांतः कामत
आराखड्यांत एजन्सी वतीन खूबशे बदल सुचयल्यात. सध्या ते विशीं कांयच सांगपाक शकना. आराखडो सादर केले उपरांत खूबशे बदल जातले, कांय उदरगतीचीं कामां वगळपाक शकतात. रिंगरोडा वयल्या व्हिक्टर हॉस्पिटला कडले जमनीची उदरगत व्हिक्टर आल्बुकर्क हांणी स्वताच्या खर्चांतल्यान केली आनी उपरांतूच लोकांक म्हत्व कळ्ळें. ते खातीर लोकांक मास्टरप्लानाचें म्हत्व कळचे हे खातीर पायलट प्रकल्प पयलीं हातांत घेतले, अशें आमदार दिगंबर कामत हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
