भांगरभूंय | प्रतिनिधी
मडगांवः केंद्रीय पर्यटन निधींतल्यान मडगांव रेल्वेस्टेशन वाठाराचें सोबितीकरण करपाचें काम केलां. तातूंत पार्कींग प्रकल्प, बसस्टॉपाचो आस्पाव आसा. कदंब म्हामंडळा कडेन रेल्वे स्टेशन ते बसस्टॅण्ड अशी बससेवा सुरू करपाची मागणी रेल्वे कडल्यान केल्ली. पूण बशींचो उणाव आशिल्ल्यान सध्या तरी बससेवा सुरू करपाक जावचें ना, अशें कदंब म्हामंडळाचे अध्यक्ष उल्हास तुयेंकार हांणी सांगलें.
मडगांव रेल्वे स्टेशनाची केंद्रीय पर्यटन खात्या वतीन दिल्ल्या निधींतल्यान उदरगत केल्या. त्या वेळार प्रवाशांचे सोयी खातीर रेल्वे स्टेशनाच्या वाठारांत बसस्टॉप बांदपाची मागणी केल्ली. मात आतां रेल आर्केड बांदचे खातीर बसस्टॉप काडला. मात अजून लेगीत कदंब म्हामंडळा कडल्यान प्रवाशांचे सोयी खातीर बससेवा सुरू करूंक ना. ताका लागून खाजगी बशी वा खाजगी गाडयांचेर प्रवाशांक निंबून रावचें पडटा.
मडगांव रेल्वे स्टेशनार कार्यावळी निमतान आयिल्ले तुयेंकार हांकां रेल्वे स्टेशना वयले बससेवे विशीं विचारलें, तेन्ना ते उलयताले. कदंद म्हामंडळा कडेन बशींचो उणाव आशिल्ल्यान साबार मार्गांचेर मागणी आसून लेगीत बससेवा सुरू करपाक मेळूंक ना. कदंबा म्हामंडळा 5- डिझॅल बशी घेतलें. इलेक्ट्रीक 100 बशी लेगीत रोखड्योच मेळपाच्यो आसात. तशेंच पणजी स्मार्ट सिटी प्रकल्पा खाला 48 बशी मेळ्ळ्यात. पूण त्यो दुसरे कडेन धाडपाक मेळना. बशी मेळ्ळे उपरांतूच रेल्वे स्टेशना वयल्या प्रवाशां खातीर बससेवा सुरू करतले. कदंब म्हामंडळ हें लोकांची सेवा म्हूण वावर करता. कदंबा म्हामंडळा कडल्यान फायद्याच्या मार्गा वयल्यो बशी कायम दवरून हेर बशी बंद केल्यार कदंबा म्हामंडळ फायद्यांत येवपाक शकता, पूण ताचो त्रास सर्वसामान्य लोकांक जातलोस हे खातीर तशें करिनात, अशें तुयेंकार हांणी सांगलें.
म्हजी बस सेवेक उत्तर गोंयांत प्रतिसाद ना
कदंब म्हामंडळा कडल्यान खाजगी बशी घेवन म्हजी बस ही सेवा विवीध मार्गांचेर सुरू केल्या. दक्षीण गोंयांतल्या खाजगी बस धनयांनी हाका बरो प्रतिसाद दिला, पूण उत्तर गोंयांत एकाय बस धनयान हे येवजणेंत वांटो घेवंक ना. दक्षीण गोंयांतल्या बशींत फायदो जाता हें कळ्ळे उपरांत ते लेगीत म्हजी बस येवजणेचो लाव घेतले. म्हजी बस येवजणे खाला खाजगी बस धनयांक दर आठ दिसांनी थारिल्ल्या दरा प्रमाण पयशे दितात, अशी म्हायती कदंब म्हामंडळाचे अध्यक्ष उल्हास तुयेंकार हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
