भांगरभूंय | प्रतिनिधी
बेकायदो वेवसाय, तरी पूण पालिकेक फारीक करतात सोपो कर
भांगरभूंय । प्रतिनिधी
मुरगांवः वास्को मुंडवेल वाडे वाठारांत बिगर गोंयकार फळां विक्रेत्यां कडल्यान गाडयेंतल्यान बिनधास्त फळ विक्री चल्ल्या. बिगर गोंयकार फळां विक्रेते वास्कोंत फळ विक्री करचे खातीर मुरगांव पालिकेक कितल्याश्याच वर्सां सावन सोपो कर दितात, अशें उजवाडाक आयलां.
त्या बिगर गोंयकार फळां विक्रेत्यांच्या राज्याच्या आमदारांनी वास्कोच्या लोकप्रतिनिधीक पत्र धाडून, आपल्या राज्याच्या फळां विक्रेत्यांक फळां विक्री करपाची मागणी केल्या, अशें थंयच्या कांय फळां विक्रेत्यांनी सांगलें. गोंय सरकार स्वयंपूर्ण रोजगार उपक्रमा खाला गोंयांतल्या लोकांचें हीत करपाचें सोडून बिगर गोंयकार फळां विक्रेत्यांचें कल्याण करता, अशें दिसपाक लागलां. एके तरेन स्वंयपूर्ण रोजगार म्हणल्यार ‘जुमला रोजगार’ आशिल्ले वरीं जालां. बिगर गोंयकार वास्को फळां विक्री करता हे विशीं मुरगांवचे नगराध्यक्ष गिरीश बोरकार हांकां विचारलें, तेन्ना तांणी आपल्याक हे विशीं कांयच खबर नाशिल्ल्याचें सांगलें.
फाटल्या कांय म्हयन्यां सावन वास्कोंत बिगर गोंयकार फळां विक्रेत्यां कडल्यान बेकायदो तरेन गाडयो उब्यो करून वेवसाय करतात. ह्या प्रकरणांत त्या बिगर गोंयकार फळां विक्रेत्यांक मुरगांव पालिकेची परवानगी आसा काय म्हूण विचारलें तेन्ना तांणी सांगलें, आमी हे सुवातेर वेवसाय करचे खातीर मुरगांव पालिकेक 100 रुपया सोपो कर दितात. तशेंच तपासणी नाक्यार केलीत आमी 500 रुपया दिवन गोंयांत प्रवेश करतात. वास्कोंत आमकां वेवसाय करचे खातीर आमच्या राज्यांतल्या थळाव्या आमदारान वास्कोच्या लोकप्रतिनिधीक पत्र धाडून आपल्या मतदारसंघांतल्या फळां विक्रेत्यांक थंय फळां विक्री करपाची परवानगी दिवची, अशी मागणी करपी पत्र दिलां, अशें थंयच्या कांय फळां विक्रेत्यांनी सांगलें. तश्या आशयाचें पत्र लेगीत त्या फळां विक्रेत्यांनी ह्या प्रतिनिधीक दाखयलें.
वास्को बिगर गोंयकार फळां विक्रेत्यां कडल्यान बिनधास्त फळां विक्री चल्ल्या, ही खबर जेन्ना नगराध्यक्ष बोरकार हांकां सांगली, तेन्ना ताणें हे विशीं आपल्याक कांयच खबर ना अशी जाप दिली. तशेंच जर मुरगांव पालिका वाठारांत बिगर गोंयकार फळां विक्री करता जाल्यार तांचेर पालिके वतीन कारवाय करतले, अशें तांणी स्पश्ट केलें. बिगर गोंयकार फळां विक्रेत्यांक लागून मुरगांव पालिका वाठारांत कायदेशीर फळां विक्री करप्यांक अर्थीक लुकसाण जाता, अशें थळाव्या फळां विक्रेत्यांनी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
