भांगरभूंय | प्रतिनिधी
भांगरभूंय । प्रतिनिधी
फोंडेंः आडपय हांगच्या आडपय युवक संघाचो 31वो वर्धापन दीस शुक्रार 26 आनी शेनवार 27 जानेवारीक दत्त मंडपात मनयतले. ह्या निमतान भेसवण सर्ते आनी गोंय पांवड्या वयली दादल्यांची भजन सर्त आयोजीत केल्या.
शुक्रार 26 जानेवारीक सकाळीं 7 वरांचेर ध्वजारोहण, 10 वरांचेर सत्यनारायण म्हापूजा, आनी म्हाप्रसाद जातलो. सांजे 5.30 वरांचेर दुर्भाट, आगापूर आनी वाडी- तळावली पंचायत मर्यादीत भेसवण सर्त जातली. 1 तें 8 आनी 8 तें 15 अश्या पिरायेच्या दोन गटांत ही सर्त जातली. सर्ती खातीर पयलीं तीन आनी दोन उमेद वाडोवपी इनामां आसतलीं. सर्ती उपरांत सांस्कृतीक कार्यावळी जातल्यो.
शेनवार 27 जानेवारीक सांजे 4 वरांचेर सर्गेस्त नमी विष्णू नायक यादस्तीक दुसरी गोंय पांवड्या वयली भजन सर्त जातली. जैतिवंत पंगडाक 11,111 रुपये आनी करंड, दुसऱ्या नंबरा वयल्या पंगडाक 7,777 आनी तिसऱ्या नंबराच्या पंगडाक 5,555 रुपये आनी 3,333 रुपयांची दोन उमेद वाडोवपी इनामां दितले. रातीं 9 वरांचेर इनाम भेटवण कार्यावळ जातली. सर्ती खातीर नांव नोंदणी आनी हेर म्हायती खातीर लवू नायक हाचे कडेन संपर्क सादपाचें कळीत केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
