भांगरभूंय | प्रतिनिधी
भांगरभूंय । प्रतिनिधी
फोंडेंः वीज पुरवणेचो प्रस्न सुटावो करपा खातीर रोखडेंच कवळें हांगा वीज उपकेंद्र उबारपाक सुरवात करतले. ते खातीर शांतादुर्गा देवस्थान समितीन वीज खात्याक जागो दिवपाचे सोपस्कार पुराय केल्यात. एक वर्स भितर हें उपकेंद्र तयार जातलें अशें वीज मंत्री सुदिन ढवळीकार हाणे सांगलें.
बांदोडें, गावणे आनी नागेशी हांगा जमनीपोंदच्या वीज जोडणी आनी रस्तो हॉटमिक्स डांबरीकरण कामाक सुरवात करून दिल्या उपरांत ढवळीकार उलयतालो. मे म्हयन्यां पयलीं मडकय मतदारसंघांतले सगल्या रस्त्याचें हॉटमिक्स डांबरीकरण करतले अशें ताणे सांगलें. ह्या वेळार जिल्हो पंचायत वांगडी गणपत नायक, सरपंच सुखानंद कुर्पासकार, वीज खात्याचो सहाय्यक अभियंतो सुदन कुंकळ्येकार आनी ग्रामस्थ व्हडा संख्येन हाजीर आशिल्ले.
मडकय मतदारसंघांत रोखडेच 30 कोटी रुपये खर्च करून उदरगतीचीं काम पुराय करतले. मे म्हयन्या मेरेन रस्तो डांबरीकरण जातलें. मलनिस्सारण प्रकल्प आनी जमनीपोंदच्यान वीज केबली घालपाच्या कामाक लागून लोकांक त्रास काडचे पडले. तसोच त्रास रस्ते हॉटमिक्स करतना जातले. मात तांणी सहकार्य केल्यार हें काम बेगीन जातलें अशें ढवळीकारान सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
