भांगरभूंय | प्रतिनिधी
भांगरभूंय । प्रतिनिधी
पोरणे गोंयः माल येरादारी करपी ट्रक ड्रायव्हरांनी दोनापावला श्यामाप्रसाद मुखर्जी स्टेडियमा लागीं पार्किग सुवातेंत जमून येरादारी सुरक्षे खातीर केंद्र सरकाराक जायत्यो सूचोवण्यो केल्यात तशेंच बरो पगार आनी सुरक्षा दिवपाची वेवस्था करपाची मागणी केल्या. येरादारी नेमांची खरसाणेन अंमलबजावणी केल्यार देशांतले अपघात उणे जातले अशें ड्रायव्हरां वतीन पत्रकारां कडेन उलयतना वाल्मिकी बिंड हाणे सांगलें.
जेन्ना अपघात जाता तेन्ना लोक फाटलो फुडलो विचार करनास्तना ड्रायव्हराक मारपेट करपाक लागतात. ताका लागून अपघात जाल्ल्याक मजत करपा परस ते घडणुकेचे सुवाते वयल्यान पळून वतात. ड्रायव्हर सुरक्षीत उरतलो हाची वेवस्था अधिकाऱ्यांनी करपाक जाय तशेंच जे कोण अपघाता उपरांत ड्रायव्हराक मारपेट करतात ताचेंर कारवाय करपाक जाय अशें तांणे सांगलें. दुचाकी आनी चारचाकी वाहनांचेर कॅमेरे बसोवपाची सक्ती करपाक जाय. ते बसयल्यार अपघाताक कारण कोण हे सोदून काडून ताका ख्यास्त करप सोपे जातलें अशें ताणे सांगले.
कांय जाण ड्रायव्हींग लायसन नासतना अवजड वाहनां चलयतात तांका सोदून काडून ताचेर कारवाय करपाक जाय. ड्रायव्हरांनी गैर वेव्हार करचो न्हय हे खातीर तांकां फावो तितलो पगार दिवपाक जाय. जो कोण 10 रोदांचें वाहन चलयता ताका म्हयन्याक 30 तें 40 हजार आनी ताच्या परस चड रोदांची वाहना चलयता ताका 50 हजार रुपया पगार मेळपाक जाय अशें बिंड हाणे सांगलें. कांय ड्रायव्हर सोऱ्याचे घुंवळेंत वाहना स्पीडीन चलयतात हें ताणे मानून घेतलें . ड्रायव्हरांच्या मागण्यात पंतप्रधान नरेंद्र मोदी हांणी लक्ष घालून पुराय देशांत व्ह्यो मागण्यो चालीक लावपाक जाय अशें ताणे सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
