भांगरभूंय | प्रतिनिधी
नवी दिल्ली, खबरां संस्था ः भारतांत संवसारांतलें चवथें बळिश्ट सैन्य आसा. लश्करी क्षमतायचे नदरेन अमेरिका सगळ्यांत बळिश्ट देश. संबंदीत डेटा दवरपी ग्लोबल फायरपॉवर ह्या संकेतथळान संवसारांतल्या 145 देशांच्या सैन्याच्या क्षमतायचें विश्लेशण करून ‘मिलिटरी स्ट्रेंथ लिस्ट-2024’ क्रमवारी जाहीर केल्या.
हे वळेरेंत रशिया दुसरो आनी चीन तिसरो आसा. 60 परस चड मापदंडांचेर आदारीत हे वळेरेची क्रमवारी केल्या. तातूंत सैनिकांची संख्या, शस्त्रां, अर्थीक स्थिती, सुवात आनी साधनसुविधा हांचो विचार केल्लो आसा. हे वळेरे प्रमाण पाकिस्तानांत संवसारांतलें 9 वें बळिश्ट सैन्य आसा.
भारतांत 25.27 लाख पॅरा मिलिटरी सैनिक आसात…
पाकिस्तानाचे तुळेंत भारतां कडेन तांचे परस तीन पटीन चड सैनिक आसात. तशेंच पाकिस्तानाचे तुळेंत भारतां कडेन तांचे परस चड पॅरा मिलिटरी फोर्स आसा. भारताच्या अर्द सैनिक दळांत 25,27,000 सैनिक आसात. पूण पाकिस्तानांत तांची संख्या फकत पांच लाख आसा. भारतांत 4641 रणगाडे आनी 606 झुजारी विमानां आसात. जाल्यार पाकिस्तानांत 3742 रणगाडे आनी 387 झुजारी विमानां आसात.
नौदलाच्या क्षमतायचे नदरेनय पाकिस्तान भारता परस खूब फाटीं आसा. पूण पाकिस्ताना कडेन 57 अटॅक हेलिकॉप्टर आसात जाल्यार भारता कडेन फक्त 40 हेलिकॉप्टर आसात. ग्लोबल फायर पॉवर कंपनीच्या पॉवर इंडेक्सा प्रमाण देशांची ही क्रमवारी थारायल्या. देशांतल्या वट्ट फायर पॉवराक पॉवर इंडेक्स अशें म्हण्टात.
भूतान हो सगळ्यांत उणो लश्करी क्षमताय आशिल्लो देश…
हातूंत अमेरिकेचो पॉवर इंडेक्स 0.0699 आसा. जाल्यार भारताचो पॉवर इंडेक्स 0.1023 आसा. आंकडेवारी प्रमाण पाकिस्तानाचो पॉवर इंडेक्स 0.1711 आसा. ग्लोबल फायर पॉवर प्रमाण भूतानाचें लश्कर संवसारांतलें सगळ्यांत दुबळें सैन्य आसा. भूतानाचो पॉवर इंडेक्स 6.3704 आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
