भांगरभूंय | प्रतिनिधी
खेळप म्हणल्यार शिक्षणाचो सत्यनास करप…. कितें खेळटा रात दीस? अभ्यास कर… सामको तवनास जाला तो दीसभर फक्त खेळ, खेळ… हीं उतरां जायत्या जाणांच्या कानांर पडल्यांत आसतलीं. आदल्या तेंपार चडूंच पडटालीं, आतां इल्लीं उणीं जाल्यांत. कारण खेळांत पयसो, नामना आयल्या. 35 वर्सां नोकरी करून तुमी जोडटात, तितलोच वा ताचे परसूय चड पयसो 10 वर्सां भितर जोडपी खेळगडे आसात. राष्ट्रीय, आंतरराष्ट्रीय पांवड्यार खेळपी कितले जोडटात, ताचें कोंत आनी हिशोब आसचो ना! फक्त खेळगडेच न्हय, तर प्रशिक्षक, खेळां काॅमेंट्री सांगपी, वैजकी अधिकारी आनी हेर कर्मचारी, अधिकारी वर्गाकूय भरपूर पयसो मेळटा. खेळगड्यांक वैयक्तीक इनामांय मेळटात, वयल्यान जेवन- खावन देश- विदेशांत फुकट प्रवास करपाक मेळटा!! हेच खातीर घडये चडशे भुरगे क्रिकेटींत करियर करपाक धडपडटात. तांची पंगडांत निवड जावची, म्हूण तांचे पालकूय खूब घाम गळयतात. अर्थांत खेळांत जो गुणेस्त आसता, तोच तिगता, बाकीचे कांय काळान कुशीक पडटात.
कसल्याय खेळांत फिशाल जातलो जाल्यार मुळांत ते गूण जाय. प्रशिक्षकाचे मजतीन वा स्वता सराव करून ते विकसीत करपाक जाय. खेळगड्याचो सगल्यांत पयलो प्रशिक्षक आसता तो शाळेंतलो पीटी शिक्षक (फिजीकल ट्रेनिंग दिवपी). ताचे कडल्यान शिकतकच कांय विद्यार्थी स्वताच्या खर्चान भायल्या प्रशिक्षका कडल्यान शिक्षण घेतात. अर्थांत हें शारांनीच शक्य आसता आनी ते खातीर कचकचीत दुडूय मोडपाक जाय. स्वता मेहनत घेवपाक जाय ती वेगळी. चडश्या हायस्कुलांनी, काॅलेजींनीय पीटी शिक्षक आसात. पूण सरकारी शाळांनी तांचो उणाव आसा. थंय तांची भरती करपाचो निर्णय गोंय सरकारान घेतला. आतां मेरेन 79 शिक्षकांची नेमणूक केल्या. आनीक 37 शिक्षक रोखडेच नेमतले. ही पदां कर्मचारी भरती आयोगा वरवीं भरपाचे आसात. रोखडीच ते विशींची जायरात येतली. जशे जशे पीटी शिक्षक निवृत्त जातले, तशे तांच्या जाग्यार नवे येतले. म्हणटकच तरणाट्यांनी ह्या फांट्याचें शिक्षण घेवप गरजेचें.
आदल्या तेंपार सकाळच्या वेळार प्रार्थना, राष्ट्रगीत म्हणपाक भुरग्यांक रांकेंत उबें करप, तांचे कडल्यान कवायत करून घेवप, मागीर फुटबाॅल वा बॅट दिवन तांकां खेळपाक धाडप, खेळां महोत्सवाची तयारी करप, सर्तीं खातीर विद्यार्थ्यांक तयार करप…. हीं कामां पीटी शिक्षक करताले. सगलेच खेळांत प्रशिक्षीत आसतालेच अशें ना. पूण ते खास करून कब्बडी, खो- खो असले खेळ भुरग्यांक शिकयताले. मात हालींच्या वर्सांनी राज्य, तालुको पांवड्यार खेळिल्ल्या खेळगड्यांचो ह्या पेशांत प्रवेश जाला आनी ताचो फायदो विद्यार्थ्यांक मेळपाक लागला. गोंयांतल्या खेळां खात्यान आनी संबंदीत शिक्षणीक संस्थांनी आपल्या पीटी शिक्षकांक चड प्रशिक्षीत करत, ताका विद्यार्थी खेळगड्यांचेर चड मेहनत घेवपाक लायत, जाल्यार राष्ट्रीय आनी आंतरराष्ट्रीय पांवड्याचेर गोंयचे विद्यार्थी नांव जोडपाक शकतात.
हे खातीर सगल्यांत पयलीं जाय ते पाचवेचार मैदान. पूण, कितल्या सरकारी, खाजगी शाळांक, काॅलेजींक अशें मैदान आसा, इन्डोअर जागो आसा? विदेशांत गाडी पार्किंगे खातीर जागो नासल्यार लायसन्स मेळना खंय. तशें मैदान ना जाल्यार शाळांक परवानो ना, अशें जावपाक जाय आसलें. हांगा कायम गाडयांनी भरिल्ल्या रस्त्याचेर शिशुवाटिका पळोवंक मेळटात!! ज्या भुरग्यांक खेळाची आवड आसा, तांकां सकाळीं, सांजवेळा खेळां प्रशिक्षण दिवपाची शिक्षकाची तयारी जाय. तालुको, राज्य पांवड्या वयल्यो सर्ती खेळच्योच, पूण गांवांतल्या शाळां मदींय सर्ती जावंक जाय. त्योय फक्त क्रिकेट, फुटबाॅल, बॅडमिंटन, कब्बडीच्योच न्हय, तर हेर खेळांच्योय!! गोंयच्या गांवगिऱ्या वाठारांतल्या विद्यार्थ्यांक हालींच जाल्ल्या राष्ट्रीय सर्तींत पदकां मेळ्ळीं. ते खेळ गोंयच्या सगल्या शाळांनी खेळप शक्य ना? खेळां खात्यान ते खातीर फुडाकार घेवचो!
सांगल्यार फट दिसतलें, गोंय मुक्ती पयलीं गोंयकार खेळगडे आॅलिंपिकांत हाॅकी, फुटबाॅल खेळ्ळ्यात. मात उपरांतच्या काळांत आमी फाटीं पडले. क्रिकेटींत गोंयान पयलो क्रिकेटर (दिलीप सरदेसाय) दिला, ताका 60 वर्सां जालीं. उपरांत पारस म्हांबरे सोडल्यार आनीक कोण आंतरराष्ट्रीय क्रिकेटींत पाविल्लो याद जायना. फुटबाॅलांत गोंय आदले वरीं उरूंक ना. निदान हेर खेळ खेळून तरी गोंयकारांनी राष्ट्रीय पांवड्यार नांव जोडचें. पीटी शिक्षक ह्या कामांत व्हडलें योगदान दिवपाक शकतात!!
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
