म्हापशें पालिकेंत गोंदळ चालूच

भांगरभूंय | प्रतिनिधी

समित्यो घडोवपा खातीर आपयिल्ले विशेश बसकेंत लोकांक आमंत्रण

भांगरभूंय । प्रतिनिधी

म्हापशें: नगरपालिका कायद्या प्रमाण पालिका मंडळाचे बसकेंत कामकाजांतले चर्चेंत पालिका मंडळांतल्या नगरसेवकां भायर कोणाकूच वांटो घेवपाची परवानगी आसना. म्हापशें पालिकेन हो कायदो मोडून कार्नावाल, शिवजयंती आनी शिमगो उत्सव समिती घडोवपा खातीर पालिका मंडळाची विशेश बसका आयोजीत करून थळाव्या लोकांक ह्या वेळार हाजीर रावपाची विनवणी केल्या.

पालिका मंडळाची ही विशेश बसका शुक्रारा 19 जानेवारीक आपयल्या. हे बसकेचें आमंत्रण भौशीक जायराती वरवीं इत्सूक लोकांक नगराध्यक्ष प्रिया मिशाळ आनी मुख्याधिकारी चंद्रकांत शेटकार हांणी दिलां.

19 जानेवारीक सकाळीं 10.30 वरांचेर कार्नवाल, ते उपरांत सकाळीं 11.30 वरांचेर शिवजयंती आनी दनपारां 12.30 वरांचेर शिमगो उत्सव समितीची निवड करपा खातीर पालिका मंडळाची बसका आपयल्या. सगळे नगरसेवक आनी इत्सूक लोकांनी बसकेक हाजीर रावून वयर नमूद केल्ल्यो समिती घडोवचे खातीर आदार करचो, असो उलो मारला. हे विशेश पालिका मंडळाचे बसकेच्यो तीन वेगवेगळ्यो नोटिसो विशया प्रमाम पालिका मंडळांतल्या नगरसेवकांक नगराध्यांनी धाडल्यात.

प्रत्यक्षांत पालिका मंडळाचे बसकेक सर्वसामान्य लोक सभाघरांत हाजेरी लावपाक शकतात, पूण खंयचेच चर्चेंत तांकां कायद्या प्रमाण वांटो घेवपाक मेळना. पालिका मंडळाची चर्चा फक्त आयकुपाचो लोकांक अधिकार आसा. ताका लागून वयल्यो समित्यो वेंचपा खातीर पालिका मंडळान आपयिल्ली विशेश बसका कायदो मोडपी आसा.

मजगतीं, सरकाराचे सुचोवणे प्रमाण आदले वयल्यो समित्यो वेंचपा खातीर बसका आपयताले. ही बसका नगराध्यक्षाच्या कॅबिनांत आपयताले. कारण तातूंत नगरसेवक आनी समितीचेर काम करपाक इत्सूक आशिल्ल्यो व्यक्ती चर्चेंत वांटो घेताल्यो. ताका लागून हे बसकेक पालिका मंडळाची बसका म्हणिनासतना पालिकेची बसका अशें म्हणटाले. हे बसकेंत समितीची निवड करून तसो थाराव घेवन अहवाल पर्यटन विकास म्हामंडळाक सादर करताले. सध्याच्या पालिका मंडळाक तशेंच पालिका अधिकाऱ्यांक पालिकेचें प्रशासकीय कामकाजूच खबर ना. पालिका मंडळाची बसका खंयच्या विशयाचेर आपयतात, ताचें गिन्यान ह्या मंडळाक ना. तशेंच अधिकारी आनी कर्मचाऱ्यांचीय योग्य मजत मेळानाशिल्यान पालिके कडल्यान बेकायदो प्रकार चल्ल्यात, अशें मत एका आदल्या नगराध्यक्षान उक्तायलें.