झरमे गांवांत चार दिसांच्यान उदकाचो उणाव

भांगरभूंय | प्रतिनिधी

टँकर कंत्राटदाराची मनमानी, लोकांनी उक्तायल्या तिडक

भांगरभूंय । प्रतिनिधी

वाळपयः माऊस पंचायत वाठारांतल्या खूबश्या गांवांनी नेमान पियेवपाच्या उदकाचो उणाव जायत आसता. फाटल्या चार दिसां सावन हेच पंचायत वाठारांतल्या झरमे गांवांत पियेवपाच्या उदकाचो उणाव निर्माण जाला.

उदका पुरवण खात्या वतीन टँकरा वरवीं उदका पुरवण करपाचो यत्न चल्ला. मात तो फावोसो ना. ताका लागून खूबश्या लोकांनी खर तिडक उक्तायल्या. मजगतीं, हें संबंदांत कांय लोकांनी थळावी आमदार डॉ. देविया राणे हांचे कडेन संपर्क करून ह्या प्रकरणांत लक्ष घालून ही समस्या तत्काळ निकालात काडपाची मागणी केल्या.

मेळिल्ले म्हायती प्रमाण फाटल्या चार दिसां सावन नळाचें उदक बंद जालां. ह्या संबंदांतली म्हायती उदका पुरवण खात्याक दिले उपरांत तांणी ह्या वाठारांत टँकराची वेवस्था केली, पूण टँकराचे धनी मनमानी करता, अशें लोकांचें म्हणणें आसा. तो दिसाक फक्त तीन टँकर घेवन येता. चड टँकराची मागणी केल्यार तो कांयचे काय जापो दिता, असो लोकांनी दावो केला.

झर्मे गांवांत 100 परस अदीक घरां आसात. फक्त तीन खेपे येवपी टँकरांतलें उदक लोकांक पावना. उदका खातीर लोकां मदीं वाद जावपाक लागल्यात. चड टँकर हाडपाची मागणी केल्यार कंत्राटदार टायरांक माती लागता अशें कारण दिता. ह्या कंत्राटदाराचेर कारवाय करची आनी गांवांतली पियेवपाच्या उदकाची सुविधा सुरळीत करची, अशी लोकांनी मागणी केल्या. अदीक म्हायती प्रमाण पायपलायनींतल्यान उदकाचो दाब उणो आसा. ताका लागून निमाण्या पोताक आशिल्ल्या झरमे गांवांत उदक पावना आनी नळ सुके पडटात. दोन वर्सां आदीं दाबोस ते झरमे ह्या गांवां खातीर कोट्यांनी रुपया खर्च करून पायपलायन मंजूर जाल्या. पूण ताचें काम अजून मेरेन सुरू जावंक ना.

टँकराच्यो खेपो वाडोवपाचे निर्देशः डॉ. राणे

सध्या झरमे गांवांतलो उदकाचो उणाव पयस करचे खातीर टँकराच्यो फावटी वाडोवपाचे निर्देश अधिकाऱ्यांक दिल्यात. ह्या निर्देशाक पाळो दिवन गांवांतलो उदकाचो उणाव पयस करचो, अशें सांगलां. फुडल्या काळांत ह्या गांवांतलो उदकाचो उणाव सासणाचो पयस जावचो, हे नदरेंतल्यान यत्न चल्ल्यात. पांवड्या पांवड्यांत हें काम निश्चीत येसस्वी जातलें, अशें आमदार डॉ. देविया राणे हांणी म्हणलां.