भांगरभूंय | प्रतिनिधी
बिलासपूर , खबरां संस्था: राम मंदिरांत व्हीआयपी प्रवेश दिवपाच्या नांवा खाला सायबर घोटाळो चालू आसा. रामजन्मभूमी गृह संपर्क अभियान ऍपच्या नांवान फायल तयार करून मोबायलाचेर लोकांक मॅसेज धाडटात. फायल डावनलोड करतांच लोक फटोवपाक शकतात. बिलासपूर पुलिसांनी असलें कसलेंच ऍप डावनलोड करचें न्हय अशें सोंलां. मेसेज मेळटांच कागाळ नोंद करपाक सांगतात.
सीएसपी पटेल हांणी सांगलां, नकळटां असलें ऍप डावनलोड करप धोक्याचें. हातूंत लोकांचो वयक्तीक डेटा चोरपा सारके सॉफ्टवेअरूय आसूं येता. अश्या लिंक्स वा फायल्स वरवीं फटोवपी तुमच्या बँक खात्यांतल्यान ऑनलायन पयशे चोरपाक शकतात. पुलिसांनी सोशल मीडिया वरवीं लोकांक शिटूक रावपाचो उलो मारला.
व्हीआयपी पासाची वेवस्था ना
प्रशिक्षणार्थी आयपीएस संदीप पटेल हांणी सांगलें, राम मंदिराक भेट दिवपाक व्हीआयपी पास दिवपा सारकी कसलीच वेवस्था ना. जाका आमंत्रण आयलां तांकां तीं धाडल्यांत. हे खातीर कसलेच तरेची मोहीम राबोवंक ना.
बँकेंतले पयशे काडटात
तोरवा हांगा रावपी आनंद निर्मळकर हे तांच्या इश्टां सयत पुरी हांगा वचपाक आशिल्ले. तांणी इंटरनेटार पुरीच्या एका हॉटेलाचो नंबर सोदलो. इंटरनेटार सांपडिल्ल्या क्रमांकार फोन करून २२ ते २७ डिसेंबर मेरेन ८ कुडी बूक करपाक सांगलें. मजगतीं आठ कुडी बूक करपाचें सांगून तांचे कडल्यान १ लाख ५२ हजार रुपया घेतले. उपरांत तांच्या मोबायलार तांणी पावती बुकूय धाडलो. पावती पळयल्या उपरांत तांकां फटयल्ल्याचो दुबाव आयलो. उपरांत तांणी पुरी हांगा रावपी तांच्या एका वळखीच्या व्यक्तीक रूम बुकींगाची चवकशी करपाक धाडलो. तेन्ना तांणी फटयल्ल्याचें सांगलें. तांचे कागाळी वयल्यान पुलिसांनी गुन्यांव दाखल करून तपास करपाक सुरवात केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
