भांगरभूंय | प्रतिनिधी
मुंबय, खबरां संस्था: मंगळारा मुंबयच्या बंगळुरू वचपी स्पायसजेटाच्या फ्लायटांत एक प्रवासी पुराय प्रवासांत टॉयलेटींत आडकलो. टॉयलेटीच्या दाराचें कुलूप तोडून ताका भायर काडलो. सुमार 100 मिनटां टॉयलेटींत आडकल्ल्यान प्रवाश्याक धपको बशिल्लो.
विमानाचें लँडींग जावचे पयलीं एअर होस्टेसीन एक स्लीप बरयली आनी ती दारा पोंदच्यान प्रवाशाक पावयली. ते स्लिपींत बरयल्लें, ‘सर, आमी दार उघडपाचो खूब यत्न केलो. पूण आमकां दार उघडपाक जावंक ना. तुमी भियेंव नाकात. आमी कांय मिनटांनी लँड करता. तुमी कमोडचें धांपणें बंद करून ताचेर बसात. स्वताचें रक्षण करात. मुखेल दार उघडटांच इंजिनियर येतलो.’
फ्लायट क्रमांक SG- 268 सोमारा रातच्या 10.55 वरांचेर मुंबयच्यान उडपाचें आसलें. मात, विमान मध्यानरातीं 2 वरांचेर उडलें. टेक ऑफ केल्या उपरांत सीट बेल्ट काडपाची परवानगी मेळटाच सीट 14 D चेर बशिल्लो प्रवासी शौचालयांत गेलो. उपरांत टॉयलेटीचें दार मोडिल्ल्यान तो भितरूच उरलो. तो भियेवन आड्डपाक लागलो. तेन्ना क्रू मेंबर्सांक टॉयलेटींत कोणतरी बंद आशिल्ल्याचें कळ्ळें. तांणी दार उघडपाचो खूब यत्न केलो. पूण तांकां येस येवंक ना.
हें विमान मंगळारा फांतोडेर 3.42 वरांचेर बंगळुरूच्या केम्पेगौडा विमानतळार देंवलें. उपरांत अभियंते आयले आनी दोन वरां उपरांत त्या प्रवाशाक भायर काडलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
