भांगरभूंय | प्रतिनिधी
नवी दिल्ली, खबरां संस्था ः भारताचो तरणाटो बुद्दीबळ खेळगडो रमेशबाबू प्रज्ञानंद (18) आयज म्हालगडो खेळगडो विश्वनाथन आनंदाक फाटीं घालून भारताचो सगल्यांत चड रेटिंग आशिल्लो खेळगडो थारलो. टाटा स्टील बुद्दीबळ सर्तीचे चवथे फेरयेंत सध्याचो बुद्दीबळ वर्ल्ड चॅम्पियन चीनाचो डिंग लीरेनाक हारोवन रमेशबाबून हो पराक्रम साध्य केलो. काळ्यो सोंगट्यो घेवन खेळटना प्रज्ञानंद 62 चाली करून जैतिवंत जालो. क्लासिकल बुद्दीबळांत सध्याच्या चॅम्पियनाचो पराभव करपी तो भारतांतलो दुसरो खेळगडो थारला.
नंबर वन प्रज्ञानंद
टाटा स्टील बुद्दीबळ सर्तींत चीनी खेळगड्यांक हारयले उपरांत सुपरस्टार प्रज्ञानंदाचे 2748.3 रेटिंग अंक जाल्यात. जाल्यार 5 फावटीं संवसारीक विजेतो आशिल्ल्या विश्वनाथन आनंदाचे रेटिंग अंक 2748 इतले आसात. प्रज्ञांदनान हाचेर अजाप उक्तायलें आनी म्हाका दिसता हांवेन सामकी सोंपेंपणान बरोबरी केल्या अशें सांगलें. संवसारीक विजेत्या आड क्लासिकल बुद्दीबळांत पयलेच खेपे जिखप म्हाका बरें दिसता अशें तांणी सांगलें.
सगळ्यांत तरणाटो ग्रॅण्डमास्टर
प्रज्ञानंद हाणें पिरायेच्या 5 व्या वर्सा सावन बुद्दीबळ खेळपाक सुरवात केली. 2018 वर्सा पिरायेच्या 12 व्या वर्सा प्रज्ञानंद भारताचो सगळ्यांत तरणाटो ग्रॅण्डमास्टर जालो. संवसारांतलो दुसरो सगळ्यांत तरणाटो ग्रॅण्डमास्टर जावपाचो विक्रमय प्रज्ञानंदाच्या नांवान नोंद जाल्लो. प्रज्ञानंदाची व्हडली भयण आर. वैशालीय ग्रॅण्डमास्टर आसा. संवसारांतली ही पयली भाव- भयणीची जोडी जी ग्रॅण्डमास्टर जाली. प्रज्ञानंद हांणी पोरूं फिडे विश्वचषक बुद्दीबळ सर्तींत बरी कामगिरी केल्ली. पूण खिताब जिखपाक चुकलो. संवसाराचो नंबर एक खेळगडो मैग्नस कार्लसन हाचे कडल्यान ताका हार घेवची पडिल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
