भांगरभूंय | प्रतिनिधी
सद्याक आमी संवसारांतली एक अर्थीक महासत्ता जावचेलें सपन पळेतात. खंयचेंय सपन पळोवप वायट न्ही. पूण असलीं सपनां पळेतना तीं साकार कशीं जातलीं वा आमी तीं साकार करूंक पावतले काय ना हाचेर चिंतप गरजेचें आसता. खंयचोय देश अर्थीक नदरेन घटमूट तेन्नाच जावंक पावता जेन्ना देशाची अर्थवेवस्था सारकी आसता. आनी ती अर्थवेवस्था सारकी उरतली जाल्यार देशांतले उद्देग धंद्यांक बळ मेळपाक जाय. ते सारके बरे वाडपाक जाय. पूण आमचे सगलेच उद्देग घटमूट आसात व्हय? सद्याचें वयर वयर वचपी शेअर मार्केट तरी तशेंच सांगता. उद्देग वेवस्थीत चल्ल्यात आनी तांची बुन्याद घट आसा म्हणून तर भायले फंड्स तातूंत दुडू ओततात. नासल्यार तांकां कितें पिशें लागलां तर मेळत तशे दुडू ओतपाक?
वयले वयर पळेल्यार हें सारकेंच दिसता. पूण खऱ्यांनीच आमी पळेतात वा आमकां दिसता तशेंच सगलें सारकें बरें चल्लां? आमी जेन्ना अर्थीक महासत्तेचें सपन पळेतात तेन्ना आमकां कांय गजालींचेर आडनदर करूंक मेळची ना. देखून आयज वाडटा तें शेअर मार्केट म्हणल्यार बोमाडो न्हय मूं? आनी हो फुटचो बी ना मूं? आमचो भ्रमनिरस बी जावचो ना मूं? अशे प्रस्न पडले बगर रावनात. हालींच एका वेळार व्हड उद्देजक म्हणून नांव मेळयल्लो आनी कोट्यांनी लोकांक ‘बेसहारा’ करून सोडिल्लो सहारा इंडियाचो मुखेली सुब्रत रॉय संवसाराक अंतरलो. णव कोटी सामान्य लोकां कडल्यान पयशे पुंजावन तांचो सहारा म्हणून दाखोवपी बेवारस जावन गेलो. हांतल्यान आमी कितेंय धडो घेतले? सामान्य लोकांचे पयशे हे. तशे सगलेच उद्देगपती सामान्य लोकांच्याच दुडवांचेर आपणालें साम्राज्य उबें करतात.
सामान्य लोक बाबडे जाण्टेपणांत गरज पडटली म्हणून इल्ले इल्ले दुडू सांठोवन दवरतात. तांकां धाडस करूंक जमना म्हणून ते बँको, विमा कंपनीं हांचे कडेन दुडू जमा करतात. एक विश्वास आसता, उणे ज्यूर जायना पूण मूळ पयश्यां मदीं भर पडटली आनी गरजेक आपणांक ते काडूंक मेळटले. हेच पयशे उद्देगपती वापरतात आनी धंदे करतात. पयसो घोळप गरजेचें. पूण ते घोळून परते मेळूंक जाय. पूण आमचे अशे उद्देगपती आसात जे सगल्यांक मामा करतात. कांय जाण तर देश सोडून गेले. आमचे खातीर ते मेल्ल्यांतूच जमा. तांचे कडसून दुडू परते मेळटले ही आस्त सोडपाची. दुडू दिवपाचे आसल्यार ते देश कित्याक सोडपाचे?
कांय जाणांनी देश सोडूंक ना पूण तांणीय दिवाळखोरी जाहीर केल्या. म्हणटकूच तांचे कडल्यान येवपाचे दुडू मेळटले काय हाचेरूय प्रश्नचिन्न उबें जालां. एकेवेळची व्हड इन्वेस्टमेंट कंपनी रिलायन्स केपिटल सद्याक निमाणे दीस मेजता. आतां हाचो फटको कितल्या बँकांक बसतलो तें कळपाचें आसा. असोच एके वेळचे गिरेस्त कंपनीचो मालक बंदखणींत आसा. देश सोडून वतना ताका विमानतळारूच अटक जाल्ली. नरेश गोयल – जेट एअरवेस हे गिरेस्त कंपनीचो मालक. सद्याक स्टेट बँके सयत बाकीच्या बँकांक पांच हजार कोटी देणें आसा. मेळपाची आशा सामकी उणी. सद्याक तो दुयेंत आसा. पयरूच ताणें न्यायमुर्तीक मेळून आपणांक बरे तरेन मरूंक दियात म्हणपाची मागणी केल्या. तो मेलो म्हणजे सोपलें मागीर. जर सगले उद्देगपती अशेच बँकांक तोपी घालीत रावले जाल्यार आमी अर्थीक सत्ता जावंक पावतले?
मागीर प्रस्न पडटा भायल्या फंड्सांक हें दिसना? कित्याक ओततात ते हांगा पयसो? आनी मागीर एक दुबाव येता, हे भारतीय कंपनींक बुडोवंकूच बी हांगा येनात मूं? एका वेळार सगलें भायल्यान आयात करपी भारत आतां सगलेंच निर्यात करूंक लागला. शस्त्रां धरून सगलें. हे गजालीचो तांकां त्रास जातलोच न्ही? जो मेरेन भारतीय कंपनी बरें काम करतल्यो, भायल्या देशांच्या निर्यातीचेर परिणाम जातलो. मागीर ते ओगी कित्याक रावतले? हांगा पयशे धाडटले, शेअरांचे मोल वाडयतले. मोल वाडटा तें पळोवन आमी भुल्लुसतले आनी आमची जोड तातूंत घालतले. आनी एक दीस हे भायले आपणालो फायदो घेवन वतले. मार्केट पडलें म्हणजे हात भाजून घेतले ते आमचेच लोक, सामान्य जनता. चड जोडीचे आशेन हातांतलेंय व्हगडायतले.
तेवटेन भारतीय कंपनींनी घाल्ले पयशे हे भायले फंड्स आपणाक जाय तेन्ना काडून घेतले. दिवंक जमलें ना जाल्यार कंपनीच ताब्यांत घेतले. कंपनी दिली ना वा घेवंक जमली ना जाल्यार बुडयतले. तांचे खातीर सोंपें तें. अॅमाझोनान बीग बाझार काबार केलो ना? एक तर आमचे कडेन सोंपयात वा दिवाळें जाहीर करात तिसरी वाट ना. बीग बाझार बियानी कडल्यान रिलायन्स कंपनीक घेवंक जमलो ना हाचे वेल्यान पळयात. जाता़ कितें तर कामगार वाऱ्यार पडटात, सामान्य शेअर हॉल्डर बुडटात आनी चड लुकसाण जाता तें बँकांचें. उणेच ते साठ प्रतिशें पयशे बुडीत खात्यार वचपाचे. हे पयशे कोणाचे तर
सामान्य जनतेचे जांणी आपणाल्या फुडाराचो विचार करून
दवरल्यात. बँक बुडल्यार तांकां खंयच्यान पयशे मेळटले? मागीर सरकार ह्यो बँको बुडच्यो न्हय म्हणून पयशे घालतली. कोणाचे पयशे तर करदात्यांचे. म्हणजेच निमाणें सगलें सामान्य जनतेच्या माथ्यार येवपाचें.
जेट एअरलायन्सचे पांच हजार कोटी, बीग बाझारचे साडेबारा हजार कोटी. हे भायर गुजरात फायनान्स, गुजरात कोक, आयडिया, हिनाफील, बिर्ला पावर, बिर्ला कोटस्पीन, एक आनी दोन न्ही शेंकड्यांनी आसात. कितल्या तरी कोटींचीं उड्डाणां हीं. कांय जाणांनी खांके
वरशे केल्यात कांय जाण करचे आसात. आमच्याच
बोल्सांतल्यान वचपाचे हें सगलें. तरी आमी आशावादी सपनां पळयतात अर्थीक महासत्तेचीं. आतां त्या रामानूच आमकां हांतल्यान सांबाळ्ळ्यार पुरो.
अभयकुमार वेलींगकार
9423884687
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
