भांगरभूंय | प्रतिनिधी
भांगरभूंय । प्रतिनिधी
शिवोलीः कामुर्ली फेरीबोट धक्क्याचें काम अर्दवट दवोरल्ल्यान फेरी सेवेक आडमेळे येतात. हें काम बेगोबेग पुराय करचे अशी वाहनचालक, प्रवासी आनी थळाव्या लोकांची मागणी आसा. कामुर्ली उदका मार्गार फाटल्या जायत्या वर्सां सांवन फेरी सेवा चलता. येरादारी वाडल्यान कामुर्ली वटेनन धक्को रुंद करपाचें काम एक वर्सा आदीं सुरू केल्लें. मात कांय म्हयन्यां उपरांत तें बंद केल्लें. हे गजालीक आतां आठ म्हयने जाले तरी काम सुरू जावपाची चिन्नां दिसनात
धक्को बांदकामाक लागून न्हंयेच्या पात्रांत लाकडाचे लोळगे पुरयल्यात, पात्रांत शिमीट काँक्रिट घातलां. ह्या अर्दवट कामाक लागून फेरीबोट चलोवपाक आडमेळे येतात. फेरीबोटीचो प्रोपेलर लाकडांत वचून बंद पडपाची शक्यताय आसा. ह्या मार्गार सध्या एक फेरीबोट आसा. ती बंद पडल्यार लोकांचे हाल जावपाची शक्यताय आसा.
फेरीबोट धक्क्याचें रुंदिकरण करपाचें कम कॅप्टन ऑफ पोर्टान बांदकाम खात्याक दिलां. सुमार 20 लाख रुपये खर्च अपेक्षीत आशिल्लो. बांदकाम खात्याक पन्नास टक्के रक्कम दिल्या. बंद आशिल्लें काम परत सुरू करपाविशीं कॅप्टन ऑफ पोर्टान बांदकाम खात्याक पत्रां बरयलीं तरी ते काम सुरू करनात. हें काम सुरू केलें ना जाल्यार आंदोलन करपाची शिटकावणी थळाव्या लोकांनी दिल्या.
—————————————————-
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
