भांगरभूंय | प्रतिनिधी
भांगरभूंय । प्रतिनिधी
काणकोणः 22 जानेवारीक अयोध्येंत जावपी रामलल्ला मूर्ती प्रतिश्ठापना सुवाळ्या निमतान काणकोण तालुक्यांतल्या पोळें तें खोला मेरेन 75 देवळांनी वेगवेगळ्या कार्यावळींचें आयोजन केलां अशी म्हायती काणकोणचो आमदार आनी सभापती रमेश तवडकार हांणे श्रीस्थळ पंचायत सभाघरांत घेतिल्ले पत्रकार परिशदेंत दिली.
अयोध्येंतल्या प्राण प्रतिश्ठापना सुवाळ्याची आमंत्रण पत्रिका आनी अक्षता काणकोणांतल्या 80 टक्के घरांनी पावल्यात. सुवाळ्या निमतान 21 जानेवारीक देवळां आनी देवळांचो वाठार नितळ करतले. 22 जानेवारीक सकाळच्यान अखंड राम जप, हनुमान चालिसा पठण, शंखनाद आनी घंटानाद, आरत्यो आनी पूजा करतले. देवळांचेर विद्युत रोशणाय आनी पणट्यो पेटयतले, अशें तवडकारान सांगलें.
काणकोणांतलीं कांय देवळां अर्थीक नदरेन बरीं आसात. ज्या देवळांची अर्थीक स्थिती बरी ना तांका विद्युत रोशणाई आनी हेर कार्यावळी करपाक आयोजक अर्थीक मजत करतले काय कितें, अशें विचारलें तेन्ना अश्या देवळांच्या समित्यांक तांच्यो कसले आडमेळे आसात ताची म्हायती दिवपाक सांगलां अशें तवडकारान सांगलें. काणकोण पालिका वाठारांतल्या चावडी ह्या मुखेल बाजारात 22 जानेवारीक सकाळी काणकोण कदंब बसस्टॅण्डा कडलो छत्रपती शिवाजी महाराज पुतळो तें मारूती देवळा मेरेन मिरवणूक काडटले. तातूंत धोल-ताश्यां वांगडा पंगड वांटेकार जातले अशें काणकोणचो नगराध्यक्ष रमकांत नायक गांवकारान सांगलें. सकाळीं 10 वरांचेर हे मिरवणुकेक सुरवात जातली. मारूंती देवळा कडेन म्हाप्रसाद जातलो. मल्लिकार्जुन देवस्थानाचो अध्यक्ष विठोबा देसाय आनी पैंगीण परशुराम पंचग्राम देवस्थानाचो अध्यक्ष उदय प्रभुगांवकारान देवळांत जावपी कार्यावळींची म्हायती दिली. पत्रकार परिशदेक वेगवेगळ्या पंचायतींचे सरपंच, काणकोणांतल्या 75 देवस्थान समितीची पदाधिकारी हाजीर आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
