भांगरभूंय | प्रतिनिधी
दावोस, खबरां संस्था : संवसारांतल्या पांच सगल्यांत गिरेस्त लोकांची गिरेस्तकाय २०२० वर्सा सावन दुपेटीन वाडल्या. तर दुसरे वटेन पांच अब्ज लोक पयलींचे परस आनीक गरीब जाल्यात. दावोस सुरू जाल्ल्या ‘संवसारीक अर्थीक परिशदे’च्या (डब्लूईएफ) पयल्या दिसा ‘ऑक्सफॅम’ हे संस्थेन आपलो वर्सुकी विशयमताय अहवाल प्रसिद्ध केलो. हातूंत जायत्यो अजाप करपा सारक्यो गाजली मुखार आयल्यात.
‘इनइक्वालिटी इंक’ ह्या अहवाला प्रमाण, सगळ्यांत चड गिरेस्त आशिल्ल्या पांच व्यक्तींची (सगळे दादले) संपत्ती २०२० त ४०५ अब्ज डॉलर आशिल्ली, ती आतां ८६९ डॉलराचेर गेली. ‘वराक १४ दशलक्ष डॉलर’ असो ह्या व्यक्तींचे संपत्ती वाडीचो वेग आसा. संवसारांतल्या सगळ्यांत व्हड १० कंपन्यांच्या मुखेल कार्यकारी अधिकार्यां मदल्या (सीईओ) सात ‘सीईओ’ वा मुखेल समभागधारक हे अब्जाधीश (डॉलरांनी) आशिल्ल्याची म्हायती अहवालातं दिल्या. तांची सगळी संपत्ती १०.२ ट्रिलियन इतली आसा. संवसारीक कल असोच उरल्यार येवपी धा वर्सांनी संवसारांत पयलो ‘ट्रिलियनर’ (एक हजार अब्ज डॉलर संपत्ती आशिल्ली व्यक्ती) पळोवपाक मेळटलो, असो अंदाज ह्या अहवालांत उक्तायला. सगळ्यांत म्हत्वाचें म्हळ्यार संवसारांतली गरिबी सोंपोवपा खातीर २२९ वर्सांचो काळ लागतलो, अशें ‘ऑक्सफॅम’न म्हणलां.
संवसारांतल्या पयल्या १४८ कंपनींनी १.८ ट्रिलियन (एक हजार अब्ज) डॉलर फायदो केलो, तो तीन वर्सांच्या सरासरींत ५२ टक्क्यांनी वाडला. तशेंच गिरेस्त शेअरधारकांक व्हड परतावो मेळ्ळा, जाल्यार प्रत्यक्षांत कोटी कर्मचार्यांचे पगार कापल्यात. भौशीक सेवा, कंपनींचें नियंत्रण, मक्तेदारी मोडप आनी कायम संपत्ती आनी अतिरिक्त फायद्याचेर कर लावप हाचे वरवीं भौशीक कारवाय करपाचो उलो ऑक्सफॅमान मारला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
