भांगरभूंय | प्रतिनिधी
इंदूर, खबरां संस्था ः गोंयात येवन एक गिरेस्त आवयन आपल्या 4 वर्सांच्या पुताचो खून केल्ल्याची खबर पुराय देशभर पाताळल्या. ह्या प्रकरणांत दर दिसा वेगवेगळें मुद्दे सामकार येत आसात. खोलायेन चवकशी करुन खुनाचो सोद लावपाचो पुलिसांचे यत्न चालू आसात. अश्यांतूच मध्य प्रदेशांतल्यान एक धक्को दिवपी खबर मुखार आयलां. बापायन आपल्या 12 दिसांच्या पुताचो खून केल्ल्याची म्हायती पीटीआयन दिल्या. ही घडणूक मध्य प्रदेशांतल्या बेतूल जिल्ह्यांत घडली. सध्या पुलिसांनी बापायक ताब्यांत घेतला.
बापायक आपल्याक एक धूव जावची अशें दिसतालें. पूण चलोच जल्माक आयिल्ल्यान तो मात्सो अस्वस्थ जालो, कारण ताका पयलींच दोन पूत आशिल्ले. जोडपें चली जावचें म्हणून वैजकी, धर्मीक उपायूय करतालें. हे निराश भावनेतल्यानच ताणें आपल्या 12 दिसांच्या पुताचो खून केलां आसूं येता अशें मुळावे चवकशेंतल्यान दिसून येता.
बज्जरवाड गांवांतल्या कोतवाली पुलीस स्टेशनाच्या वाठारांत आयतारा, 14 जानेवारीक ही घडणूक घडली. आरोपीचें नांव अनिल उईके आसून तांणे खून करचें पयलीं आपले बायलेक बडयली. सोऱ्याचे नशेंत बायलेक मारतना ताणें आपल्या 12 दिसांच्या भुरग्याक बायलेच्या हांतातल्यान काडून घेतलो. आपल्याक अजून मारतलो ह्या भंयान ती बायल थंयच्यान पळून गेली. कांय काळा उपरांत ती घरा परतली तेन्ना तिका आपलें भुरगें मेल्लें दिसलें. भुरग्याचो गळो आवळिल्ल्याच्यो खूणां आशिल्ल्याचें पुलिसांनी सांगलें.
उल्लेख केल्ल्या प्रकरणांत उईके आड एफआयआर दाखल केला. चवकशे वेळार उईकेच्या कबुली प्रमाण, ताका पयलींच दोन पूत आशिल्लें आनी तिसरे खेपे ताका चली जावची अशीं अपेक्षा आशिल्ली, पूण चलो जाल्ल्यान तो सामको अस्वस्थ आशिल्लो. सध्या पुलिसांनी उईके आड कलम 302 खाला गुन्यांव नोंद केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
