भांगरभूंय | प्रतिनिधी
नीति आयोगाचो अहवाल
नवी दिल्ली, खबरां संस्था ः भारतांत फाटल्या 9 वर्सांत 24.8 कोटी लोक गरिबींतल्यान भायर सरले. तातूंतले चडशे 5.94 कोटी लोक उत्तर प्रदेशांतले आसात. ते उपरांत बिहारांत 3.77 कोटी, मध्य प्रदेशांत 2.30 कोटी आनी राजस्थानांतल्या 1.87 कोटी लोकांची ‘गरिबी पातळी’ सुदारल्या.
नीती आयोगाच्या अहवाला प्रमाण, भारतांतलें गरिबीचें प्रमाण 2013-14 वर्सा 29.17 टक्क्यांवयल्यान 2022- 23 वर्सा 11.28 टक्क्यांचेर पावलां. म्हणल्यार फाटल्या 9 वर्सांत 17.89 टक्के उणाव आयला.
सुदारीत शिक्षण, भलायकी आनी जिणे पद्दत अशा मापदंडांचेर आदारून गरिबींतली सुदारणा मेजल्या. तातूंत भुरग्यांचें पोशण, मरणाचे प्रमाण, आवयची भलायकी, शालेय शिक्षण, शाळेंतली हाजिरी, रांदपाचें इंधन, नितळसाण, पिवपाचें उदक, वीज, घरां, मालमत्ता आनी बँक खातीं ह्या घटकांचो आस्पाव जाता.
गरिबीं उणी जावपाचो वेग चार टक्क्यांनी चड
अहवाला प्रमाण 2015-16 ते 2019-21 मजगतीं गरिबी उणी जावपाचो वेग 10.66 टक्के आशिल्लो.
डेटा पळयल्यार बहुआयामी गरिबी निर्देशांक (Multidimensional Poverty Index) च्या सगळ्या 12 निर्देशकांनी म्हत्वाची सुदारणा दिसून आयल्या. पॉशन अभियान आनी अॅनिमिया मुक्त भारत ह्या सारक्या उपक्रमांक लागून भलायकी सुविधांनी खूब वाड जाल्या.
प्रधानमंत्री गरीब कल्याण अन्न येवजणे वरवीं खावपाच्या सवयींनी सुदारणा
ते भायर संवसारांतल्या सगळ्यांत व्हडल्या अन्न सुरक्षा कार्यावळी खाला गांवांनी आनी शारांनी 81.35 कोटी लोकांक फुकट धान्य दिले. ताका लागून तांच्या खावपाच्या सवयींनी खूब सुदारणा जाल्या.
उज्ज्वला, जन धन आनी आवास येवजणेचो व्हड फायदो
बायलांचे भलायके संबंदीत वेगवेगळ्या कार्यावळींनी, उज्ज्वला येवजणे खाला निवळ रांदप, सौभाग्या वरवीं वीज कव्हरेजांत सुदारणा आनी स्वच्छ भारत मिशन आनी जल जीवन मिशन ह्या सारक्या मोहिमांनी लोकांची जिणे पद्दत खूब सुदारल्या अशें अहवालांत म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
