भांगरभूंय | प्रतिनिधी
अयोध्या, खबरां संस्था : प्राणप्रतिश्ठा सुवाळो हो हिंदू शास्त्रां प्रमाणूच जाता. कारण ह्या देवळाचो गाभारो पूर्ण जाला. म्हाका आयज खूब खोस जाल्या. चौदा वर्सां उपरांत राम जेन्ना अयोध्येक आयले तेन्ना लोकांची जी प्रतिक्रिया आशिल्ली, तशीच प्रतिक्रिया आतां म्हणजी आसा, अशें
संस्कृत विद्वान, पद्मविभूषण स्वामी रामभद्राचार्य महाराज हांणी म्हणलां.
प्रधानमंत्री नरेंद्र मोदी हांणी ह्या सुवाळ्या खातीर इकरा दिसांचो कडक उपास धरला. असो उपास धरपी प्रधानमंत्री तुमी केन्ना पळयला? अशेंय तांणी विचारलां. पाकिस्ताना कडेन आशिल्लें काश्मीर भारताक मेळचें म्हूण अयोध्येंत विशेश यज्ञ दवरला. जर हनुमान सीतामातेक परत हाडपाक शकता जाल्यार ते आमची भुंय पसून परत हाडपाक शकतात, अशेंय तांणी सांगलें.
श्री राम मंदिर ट्रस्टाचें म्हणणें कितें?
‘तीन मजली देवळाचो पयलो मजलो पुराय जाला. उरिल्लें बांदकाम दोन वर्सां भितर जातलें. मात 22 जानेवारीक देवूळ भाविकां खातीर उक्तें जातलें’, अशें मंदिर ट्रस्टाचे सरचिटणीस चंपत राय हांणी सांगलें. शंकराचार्य हजर रावचें नात, अशें छापून आयलां, ताचेर प्रतिक्रिया दितना तांणी सांगलें, ‘हें मंदिर रामानंद संप्रदायाचें. शैव, शाक्य आनी संन्याशांचें न्हय. अठराव्या शेंकड्यांतल्या वैष्णव संत स्वामी रामानंद हांच्या शिश्यांनी निर्मोही अणी, दिगंबर अणी आनी निर्वाणी अणी हे तीन आखाडे स्थापन केल्ले. तांणी निंबार्क, रामानंद आनी मध्वगोडेश्वर ह्या चार उपपंथांची स्थापना केल्ली. रामानंद पंथान विष्णूचो अवतार आशिल्ल्या रामाचे परंपरेचें फकत पालन केलें आनी सगल्या जातींक सनातन धर्मांत आसपावन घेतले.’
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
