भांगरभूंय | प्रतिनिधी
शिवोलीः शिवोलच्या भलायकी उपकेंद्राचे जोड इमारचीचें लोकार्पण 17 जानेवारीक जातलें. भलायकी मंत्री विश्वजीत राणे हांचे हाजिरेंत हो सुवाळो जातलो, अशी म्हायती आमदार डिलायला लोबो हांणी दिली.
शिवोलच्या भलायकी उपकेंद्राचे जोड इमारतीचें काम सुमार 15 वर्सां आदीं हातांत घेतिल्लें. हें काम खूबश्या कारणांक लागून आडावल्लें. सुरवेक दोन कंत्राटदार काम सोडून गेले. आतां तिसऱ्या कंत्राटदारान हें काम पुराय केलां.
वेंचणूक प्रचारा वेळार ह्या भलायकी उपकेंद्राचे जोड इमारतीचें काम पुराय करपाचें आस्वासन डिलायला लोबो हांणी दिल्लें. वेंचून आयले उपरांत तांणी विशेश लक्ष दिवन कामाची फाटपुरवण लावन धरिल्ली.
शिवोली भलायकी उपकेंद्राचो लाव शिवोली आनी भोंवतणच्या सात गांवांक जाताच, तशेंच तो पेडणें म्हालांतल्या दुयेंतींक जाता. नवे इमारतीचें लोकार्पण केले उपरांत पोरणे इमारतीचें पुनर्निमाण करपाचेर भर दितले.
आमदार डिलायलो लोबो हांणी भलायकी केंद्राचे जाल्ले आवतिकाये कडेन लक्ष दिलें. ते खातीर तांचे कारकिर्दींत जोड इमारतीचें लोकार्पण जाता. ह्या भलायकी केंद्राचो थळाव्यांक व्हड फायदो फुडारांत लेगीत जायत रावतलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
