भांगरभूंय | प्रतिनिधी
भांगरभूंय । प्रतिनिधी
बेळगांवः भुरग्यांचेर ल्हानपणा सावन मायभाशेंतल्यान संस्कार करपाक जाय. दरेकल्यान आपली मायभास कशी तिगतली हाचो विचार करपाक जाय. गोंयकार खंय गेलो जाल्यार ताका ताच्या कोंकणी मायभाशे वल्यान वळखतात अशें गोंयचो कला आनी संस्कृती मंत्री गोविंद गावडे हाणे सांगलें. बेळगांवांत डायोसेशन वतीन उजवाडायतात त्या कोंकणी मॅक्झिन उजवाडाच्या रुप्या महोत्सवी कार्यावळीच्या निमतान आयोजीत केल्ल्या कोंकणी लोकोत्सवाच्या उक्तावण कार्यावळींत ते उलयताले.
कॅम्प बेळगांव हांगा सेंट झेवियर्स हायस्कुल हॉलांत आयोजीत केल्ले हे कार्यावळीक बेळगांवचो बिशप डॉ डॅरीक फर्नांडीस, उत्तर बेळगांवचो आमदार राजू सेठ, कोंकणी साहित्यिका हेमा नायक, जॉर्ज फर्नांडीस, पर्वरीच्या प्रबोधिनी म्हाविद्यालाचो प्राचार्य डॉ भूषण भावे हाजीर आशिल्ले. कोंकणी गोय राज्याची राजभास आसा. गोंयकार पुराय संवसारभर पातळ्ळ्यांत आनी कोंकणीक ते आपली मायभास मानतात अशें गावडे हाणे फुडे सांगलें. घाट माथ्यार कोंकणी भास आनी कोंकणी संस्कृती तिगोवन दवोरपाचें व्हडलें काम पत्रकार लुईश रॉड्रिग्ज आनी तांचो पंगड करता. गोंयां भायर आमच्या कोंकणीचें संवर्धन करपा खातीर आमचें सरकार फावो ते यत्न करतले अशेंय ताणे सांगलें.
आपल्या येवकाराच्या उलोवपांत उजवाडाचो संपादक लुईस रॉड्रिग्जान उजवाड मॅक्झिनाच्या वावराचो नियाळ घेतलो. डॉ भूषण भावेन कोंकणी सांस्कृतीक राज्य निर्मणी करपाची गरज आपल्या भाशणांत उक्तायली. कोंकणी मनीश संवसारांत खंयूय आसू आमी कोंकणी सांस्कृतीक राज्य निर्मणी करपाची गरज आसा. कर्नाटक आनी केरळांत कोंकणी आकादेमी आसात पूण महाराष्ट्रांत ना. ती थंय स्थापन करची हे खातीर गोंय सरकारान फुडाकार घेवपाक जाय. गोंया भायर कोंकणी भाशेच्या संवर्धना खातीर गोंय सरकार आनी संघटनांनी तेंको दिवपाक जाय अशें ताणे सांगलें. राजू सेठ, बिशप डॅरीक फर्नांडीस आनी जॉर्ज फर्नांडीस हाणी आपले विचार मांडले.
कार्यावळींत मिलाग्रीन डिसोझा, आनामारी बार्देसकार, मोनिका डान्टास, गीता सुरिदंर भगत, डॉ मनिषा रेगो, सुलतान एनजीओचो बास्तू रेगे, अशोक पै, होप सेंटर गोंयचो फादर प्रदीप कुरय्या, गौरीष वेर्णेकार, ग्राब्रियल डिसोझा हांचे सयत 14 जाणांक गौरव पुरस्कार भेटयले. सांजेच्या सत्रांत म्हाड्डोळच्या सिद्धिविनायक म्हाळसा कला संघान कोंकणी लोक नाच सादर केले. ही कार्यावळ गोंयच्या कला आनी संस्कृती खात्यान पुरस्कृत केल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
