भांगरभूंय | प्रतिनिधी
भांगरभूंय । प्रतिनिधी
मुरगांवः येता ते लोकसभा वेंचणुकेंत दक्षीण गोंयांत भाजपाचो उमेदवार 60 हजारांच्या मताधिक्यान जैतिवंत जातलो असो विस्वास मुख्यमंत्री डॉ प्रमोद सावंत हांणी मुरगांव पुलीस चौकीच्या उक्तावणा वेळार उक्तायलो. नारी शक्त, युवा शक्त आनी किसान शक्त तशेंच गरीब कल्याण येवजणे वरवी दरेकाची उदरगत करपा खातीर भाजपाचें राज्य आनी केंद्र सरकार फुडाकार घेता अशेंय तांणी ह्या वेळार सांगलें.
बायणा दर्या वेळेर पुलीस चौकीच्या उक्तावण कार्यावळीक राज्यसभा खासदार सदानंद शेट तानावडे, राज्यसभा खासदार सदानंद शेट तानावडे, मुरगांवचो आमदार संकल्प आमोणकार, साळगांवचो आमदार केदार नायक, राज्य भाजप सरचिटणीस दामू नायक, आदलो खासदार अँड. नरेंद्र सावयकार, मुरगाव पालिका नगराध्यक्ष गिरीश बोरकर, मुरगांव भाजप गटाध्यक्ष संजय सातार्डेकार, नगरसेवक दीपक नायक, संतोष केरकार, रवींद्र भवन बायणाचो उपाध्यक्ष डॉ. धमेंद्र प्रभुदेसाय, नगरसेविका कृणाली पार्सेकार, वास्कोचो पुलीस उपअधीक्षक शेख सलीम, मुरगांवचो पुलीस निरीक्षक एलविटो रॉड्रिगीस, वास्कोचो निरीक्षक कपील नायक आनी हेर मानेस्त हाजीर आशिल्ले.
राज्यांतल्या तरणाट्यां खातीर स्कील इंडिया येवजणे खाला वेगवेगळे उपक्रम चालीक लायल्यात. तरणाट्यांनी ताचो फायदो घेवपाची गरज आसा. केंद्र सरकारान म्हामार्गा खातीर गोंयांक 22 हजार कोटी रुपये खर्च करून राज्याक उदरगतीच्या मार्गार व्हेला. ताका लागून लोकसभा वेंचणुकेत गोंयांतल्या दोनूय सुवातांनी भाजपाक जैत मेळटलो हातूंत मातूय दुबाव ना अशें मुख्यमंत्र्यान सांगलें. देशांत पांचशें वर्सां उपरांत श्रीराम मंदिर जाता. राम मूर्ती प्रतिश्ठापना व्हो दीस दरेका भारतीया खातीर खोशेचो दीस आसा, अशें सदानंद शेट तानावडेन सांगलें. राज्यांत डॉ सावंत आनी केंद्रात मोदी सरकार उदरगतीच्या कामांत अग्रेसर आसा अशें ताणे नमूद केले. मुरगांव मतदारसंघात 10 हजार जाणांक आपणे भाजपाचे वांगडी केल्यात अशी म्हायती संकल्प आमोणकारान दिली. मतदारसंघांत नवे भलायकी केंद्र उबारपा खातीर सरकारान मंजुरी दिल्या अशी म्हायती ताणे दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
