भांगरभूंय | प्रतिनिधी
नवी दिल्ली, खबरां संस्था: फाटल्या कांय दिसां सावन उत्तर आनी मध्य भारतांतल्या हवामानांत बदल जाल्ल्यान विमान सेवेक कळाव जाला. दिल्लीचें वातावरणूय सतत इबाडिल्ल्यान थंय सगळे कडेन धुंवटें पातळ्ळां. ताका लागून जायत्या विमानांक कळाव जाता. ह्या कारणाक लागून १४ जानेवारीक दिल्ली सावन गोंयां येवपी इंडिगोचें विमान १३ वरां उसरां उडलें. १३ वरां कळाव जाल्ल्याची म्हायती मेळटकच एका प्रवाशान पायलटाचेर हल्लो केलो. सोशल मिडियाचेर हो व्हिडियो व्हायरल जाले उपरांत आतां इंडिगो प्रशासनान संबंदीत प्रवाशा आड कारवाय करपाची शिटकावणी दिल्या.
१४ जानेवारीक ६ ए २१७५ विमान दिल्लीच्यान गोंयांत येतना दनपरां १ वरांचेर ही घडणूक घडली. विमानाक १३ वरां कळाव जाल्ल्यान सगळे प्रवासी तिडकल्ले. रागा भरार एका प्रवाशान पायलटाचेर हात उखल्लो. सोशल मिडियाचेर व्हायरल जावपी व्हिडियोंत इंडिगो विमानाचे कॅप्टन विमान १३ वरां कळाव जाल्ल्याची म्हायती दितालो. मजगतीं थंय आशिल्ल्या एका प्रवाशान येवन पायलटाचेर मूठ मारली. ह्या व्हिडियोचेरय जायत्या जाणांनी टिप्पणी केल्या. ते प्रमाण ह्या संबंदीत प्रवाशा आड कारवाय करपाची मागणी खर जाल्ल्या. तशेंच कांय प्रवाशांनी इंडिगोक जाल्ल्या कळावा कडेन लक्ष दिलें. हे संबंदी पुलिसां कडेन एफआयआरय नोंद केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
