भांगरभूंय | प्रतिनिधी
नवी दिल्ली, खबरां संस्था : केंद्र सरकाराच्या ‘आयुष्मान भारत प्रधानमंत्री जन भलायकी येवजणे’ खाला आतां मेरेन देशांत ३० कोटी आयुष्मान कार्डां तयार जाल्यांत. भलायकी मंत्रालयाच्या म्हणण्या प्रमाण उत्तर प्रदेश (४.८३ कोटी), मध्य प्रदेश (३.७८ कोटी) आनी महाराष्ट्र (२.३९ कोटी) हांगा सगळ्यांत चड कार्डां जाल्यांत. फाटल्या दोन अर्थीक वर्सांत १६.७ कोटी कार्डां तयार जाल्यांत आनी चालू वर्सा २०२३- २४ वर्सा आतां मेरेन ७.५ कोटी कार्डां तयार जाल्यांत. म्हणल्यार देशांत दर मिण्टांत १८१ कार्डां तयार जातात.
हे येवजणे खाला आतां मेरेन ६.२ कोटी लोकांक हॉस्पिटलांत उपचार केल्यात आनी सरकाराक ७९,१५७ कोटी रुपया खर्च आयला अशें भलायकी मंत्रालयान सांगलें.
हे येवजणे वरवीं समाजांत समानताय वाडत आसा अशेंय भलायकी मंत्रालयान सांगलां. वट्ट ३० कोटी कार्डांतलीं ४९% कार्ड बायलां खातीर आसात. तशेंच हे येवजणे खाला उपचार घेवपी ४८% बायलां आसात. प्रधानमंत्री मोदी हांणी २३ सप्टेंबर २०१८ दिसा ही येवजण सुरू केल्ली.
तिसरो टप्पो १७ सप्टेंबर २०२३ सावन सुरू
आयुष्मान येवजणेचो तिसरो टप्पो (आयुष्मान ३.०) १७ सप्टेंबर सावन सुरू जालो. तिसर्या टप्प्यांत कार्ड तयार करपाची प्रक्रिया सोपी केली. तिसर्या टप्प्या उपरांत लोकांची वळखपत्रां नेटान तयार जालीं. लोक ऑनलायन नोंदणी करून हें काम करताले.
स्वताची नोंदणी मोबायला वरवीं करूं येता
आयुष्मान कार्ड तयार करपा खातीर केंद्र सरकारान मोबायल फोनाचेरूय आयुष्मान कार्ड ऍपा वरवीं अर्ज करपाची सुविधा दिल्या. अॅप डावनलोड केल्या उपरांत लावार्थ्यांक मोबायल नंबराच्या आदारान नोंदणी करची पडटा. हाचे उपरांत ओटीपी, आयरीस आनी फिंगरप्रिंट आनी मुखामळार आदारीत व्हॅरिफिकेशनाच्या आदारान नोंदणी प्रक्रिया पुराय करची पडटा.
हांगा तुमकां रेशन कार्ड, आधार कार्ड, रेसिडेन्ट सर्टिफिकेट, पासपोर्ट सायज फोटो, पॅन कार्ड वा हेर गरजेचे कागदपत्र अपलोड करचें पडटलें. हाचे उपरांत सरकार तुमची विनंती सत्यापीत करून तुमचें नांव येवजणेंत नोंद करतलें. पूण, हे प्रक्रिये पयलीं तुमी ताचे खातीर पात्र आसात काय ना तें तपासचें.
तुमी आयुष्मान कार्डा खातीर पात्र आसात काय ना तें जाणून घेवपा खातीर फोन करचो. हे येवजणे खातीर पात्रतायेचे कांय निकश थारायल्यात. ही पात्रताय आशिल्ल्या लोकांक आयुष्मान कार्डा खातीर अर्ज करपाक मेळटा. आयुष्मान येवजणे खातीर पात्रताय तपासपा खातीर तुमी १४५५५ वयल्यान फोन करूं येता. तशेंच तुमी pmjay.gov.in सायटीचेरूय तुमची पात्रताय तपासूंक शकतात.
हे येवजणेंत सगळ्या रोगांचो आस्पाव जाता
बरोच काळ चलपी रोगांचोय हे येवजणेंत आस्पाव जाता. खंयच्याय दुयेंसाक लागून हॉस्पिटलांत दाखल जावचे पयलीं आनी उपरांतचो खर्च भरता. हातूंत येरादारीचो खर्चूय आसपावता. हातूंत सगळ्यो वैजकी चांचण्यो, ऑपरेशनां, उपचारां आदी आस्पावतात. आतां मेरेन ५.५ कोटी परस चड लोकांनी हे येवजणे खाला उपचार केल्यात
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
