भांगरभूंय | प्रतिनिधी
कांय पदां खूब म्हणल्यार खुबच गाजतात. कांय वर्सांनी तीं लोकांक आवडटाच, अशें ना. पूण त्या काळांत ताची सामकी हवा जाल्ली आसता. अशेंच एक उर्दू गीत ‘हवा, हवा, ए हवा खुशबू लुटा दे, कहाँ खुली, हाँ, खुली ज़ुल्फ़ बता दे…’ 1987 वर्सा गाजिल्लें. भारत, पाकिस्तान, बांगलादेशांत तर चडूच. गायक आशिल्लो पाकिस्तानी पाॅप गायक हसन जहांगीर.
‘हवा हवा’ हें गीत हवेक उद्देशून आसा. पदाची ट्यून कौरोश याघमाय हांच्या 1979 च्या पर्शियन पदाचेर आदारीत आसा. हसन जहांगीराचें हें पद 1986 त रेकॉर्ड जाल्लें. संगीत ताणेंच दिल्लें. गीतकार एम डी नासीर. ह्या पदाची चाल आनी बीट्स हाका लागून तें गाजलें, अशें जाणकार म्हणटात. ह्याच ‘हवा हवा’ अल्मबांत ‘शावा के नखरा गोरी दा, आजा ना दिल है दिवाना, ये फॅशन के, किस नाम से पुकारुं, आया है मोसम प्यार का, जी जी ओ पारा डिस्को, जिंदगी है प्यार…’ अशीं उर्दू, पंजाबी, हिंदी पदां आशिल्लीं. तातूंतलीं भोवतेक गाजलीं. पिरायेची पन्नाशी हुपिल्ल्यांक तीं याद आसतलीं.
‘हवा हवा’ पदाचे जायते रिमेक जाले. डाॅन 2 (व्हिडियो फिल्म, 1987), जवाँ जवाँ इश्क जवाँ (गोविंदा- बिल्लू बादशाह, 1989), आया आया प्यार आया (सनी देवल- आग का गोला, 1989), इन्साफ अपने लहूं से (1994), चालीस चौरासी (2012), मुबारकाँ (2017) हातूंत हवा हवाचे रिमेक आसात. बांगलादेशांतूय ‘खला खला’ नांवान तें आयलें.
हसन जहाँगीराचो जल्म 1 जुलय 1962 दिसा जालो. तो कराचीचो. 1982 त ताचो ‘इमरान खान इज ए सुपरमॅन’ हो अल्बम आयलो. मात ‘हवा हवा’ हो एकूच आंतरराष्ट्रीय पांवड्याचेर गाजलो. एका भारतांतूच ताच्यो देड कोटी वयर कॅसेटी खपिल्ल्यो. 2011 त हसन बंगाली लोकगीत ‘डोल डोल डोलो नी’ वरवीं परत उजवाडांत आयलो. 1987 उपरांत हसन जहाँगीरान संवसारभर जायते स्टेज शो केले. कोक स्टुडियोंत ताचीं कांय पदां आसात. मात, तो दीर्घ काळ फिल्मी वा बिगर फिल्मी संगीत संवसारांत तिगलो ना.
ऑडियो- इश्टर म्युजिकाच्या बरेपणान
https://music.youtube.com/watch?v=sgUcmJHHC3Q&si=DgpZr3SO8qwFrBxH
डी. महेश
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
