भांगरभूंय | प्रतिनिधी
वाळपय पालिकेची शिटकावणी; घरपटी, ट्रेड ऑक्युपेशन भरपाक आठ दिसांची मुजत
भांगरभूंय । प्रतिनिधी
वाळपयः वाळपय पालिका वाठारांत चलपी कांय दुकानां आनी आस्थापनांनी अजून मेरेन घरपटी आनी ट्रेड ऑक्युपेशन भरूंक ना. आठ दिसां भितर ती थकबाकी भरची. ना जाल्यार आस्थपनां सील करपाची कारवाय करतले, अशी शिटकावणी वाळपय पालिका मुख्याधिकारी दशरथ गांवस हांणी दिली.
वाळपय पालिका वाठारांत खूबशीं दुकानां आसात, आस्थापनां आसात. खूबश्या वर्सां सावन खूबश्या आस्थ्पनांनी आनी दुकानकारांनी ट्रेड आनी ऑक्युपेशन परवाने घेवंक नात. बेकायदेशीरतरेन पालिका वाठारांत हीं दुकानां आनी आस्थापनां चलतात. तीं व्हड प्रमाणार वेव्हार करतात. तांणी हे संबंदांतली परवानगी पालिके कडल्यान घेवप गरजेचें आशिल्लें. मात तांणी हे संबंदांत गांभिर्य दाखोवंक ना. पालिकेच्या महसुलांत हाका लागून व्हड प्रमाणांत उणाव जाता. हे खातीर पालिकेक हाचें अर्थीक लुकसाण जाता. आतां पालिका आक्रमक जातली. फाटल्या कांय दिसां सावन खूबश्या आस्थापनांक आनी दुकानकारांक हे संबंदांतल्यो नोटिसो दिल्या, अशी म्हायती गांवस हांणी दिली.
आतां फक्त आठ दिसांची मुजत दिल्या. आठ दिसां भितर हे संबंदांतली थकबाकी भरली ना जाल्यार आस्थापनां आनी दुकानांक सील मारतले. अजापाची गजाल म्हमल्यार हातूंत बँकांचो आस्पाव आसा. बँको लेगीत अशे तरेन पालिकेक फटयतात, हें खऱ्यांनीच दुर्दैव. हे मुखार कसलींच घाळपणां करिनासतना आनी आठ दिसांचे मुजतींत तत्काळ पालिकेंत थकबाकी भरची. तशेंच जांणी अजून मेरेन परवाने घेवंक नात, तांणी ताकतिकेन परवाने घेवचे. ना जाल्यार कायदेशीर कारवाये पासून कोणूच आडावपाक शकचे नात, अशें गांवस हांणी सांगलें. हे संबंदांत प्रतिक्रिया दितना नगराध्यक्ष प्रसन्ना गांवस हांणी सांगलें, नगरपालिकेचो महसूल वाडोवप खूब गरजेचें आसा. पालिके मुखार अर्थीक समस्या निर्माण जाल्या. तरी लेगीत कांय जाणांनी अजून मेरेन थकबाकी भरूंक ना, ही सामकी वायट गजाल. हे खातीर पालिकेन आक्रमक जावपा बगर दुसरो कसलोच उपाय ना. खूबश्या आस्थापनांक हे आदीं खूब तरेच्यो नोटिसो धाडल्यात. मात त्यो नोटिशी कोयराच्या डब्यांत उडयल्यात. हो पालिकेचो अपमान.
मुख्याधिकाऱ्यांची भुमिका खऱ्यांनीच बरीः नगराध्यक्ष
नोटिसो धाडून लेगीत थकबाकी भरूंक नाशिल्ल्यान आतां आस्थापनां आनी दुकानां सील करपा बगर दुसरो कसलोच पर्याय ना. ही मुध्याधिकारी दशरथ गांवस हांणी घेतिल्ली भुमिका खऱ्यांनीच बरी आसा. तातूंत पालिकेचे तिजोरेंत अर्थीक भर पडटली, अशें नगराध्यक्ष प्रसन्ना गांवस हांणी सांगलें.
थकबाकी संबंदांत कसलीच तडजोड नाः मुध्याधिकारी
थकबाकी संबंदांत कसलीच तडजोड करचे नात. पालिका ह्या संबंदांत आक्रमक धोरण आंखतली. हे संबंदांतल्यो संबंदितांक नोटिसो दिल्यात. मात होय् नोटिसांक अजून मेरेन प्रतिसाद दिवंक ना. ताका लागून आतां मातूय कळाव करिनासतना कायदेशीर कारवाय करतले, अशें दशरथ गांवस हांणी स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
