नोकरी, धंदे आनी आमचे तरणाटे

भांगरभूंय | प्रतिनिधी

आमचे तरणाटे आमच्या समाजाचो फुडार आसा म्हूण आमी मानतात. समाजाचें वायट वा बरें सगळें तांचेरूच आदारीत आसा. एक काळ आसलो की आमी क्रिस्ती समाजांतले लोक अदीक सुधारिल्लो लोक म्हूण समजताले. आयज तो काळ उरूंक ना. आयज आमच्या क्रिस्ती समाजांतले लोक अदीक बिगडलेले लोक म्हणल्यार फट जावची ना.
आमचे धंदे
आमच्या सर्व भोंवतणी मात्शी नदर मारुया. गोंयांत धंदे करपी लोक अदीक कोण? क्रिस्ती वा हिंदू? दुबाव नासतना हिंदू समाजांतल्यो भाव – भयणी धंद्यांत अदीक मिसळ जाल्ल्यो आसात. जायत घडये गोंयांत हिंदू लोकांचो आंकडो सुबेज म्हूण. पूण दुसऱ्या अर्दान नियाळ केल्यार आमकां कितें दिसता? गोंयांत तार्वेनां, बार्रां वा सोऱ्यांच्यो गादयो हांचो धंदो अदीक कोण करता? दुबावा विणें क्रिस्ती लोक. कसलो म्हूण धंदो आमी वेंगावन धरला? सोऱ्याचो, गरीब
घराबे नास करपी असलो हो धंदो आमी वेंगायतात. गोंयच्या वेळांचेर शॅक्स कोण चलयतात?
वेळांचेर चडांत– चड शॅक्स चलोवपी क्रिस्ती तरणाटे. शॅक्स चलोवन फास्ट दुडू एकठांय करूंक जाता म्हूण काय? दुसऱ्या अर्दान कांय शॅक्स हातूंत गुंगेचीं (ड्रग्स) वखदां सोंपेपणीं मेळटात म्हूण सगळेच उलयतात. तिसरो धंदो म्हणल्यार टॅक्सी घेवप आनी भाडीं मारप. तशेंच मोटार सायकल घेवप आनी भाडीं मारप. नातर त्यो भाड्यांक दिवन दुडू कमोवप. हें सांगपाचें इतलेंच कारण की टुरीझमाच्या स म्हयन्यां भितर भरपूर दुडू करप आनी उरिल्ले म्हयने आळशीपणान सारप.
उद्देगीक वसणूक
आनीक एक विचित्र गोश्ट जीं आमच्या गोंयांतल्या क्रिस्ती तरणाट्यां भितर दिसता, ती म्हणल्यार उटलो- सुटलो गल्फाक ना तर लंडनाक वचप. गल्फाक ना तर लंडनाक गेल्ल्यांनी जायतो दुडू केला आनी आपलो स्वताचो उकल केला. हातूंत मात्तूय दुबाव ना. पूण आपले भुंयेर मात तांणी उदरगत करूंक तांकां शक्य जालें ना. म्हणचें आमच्या गोंयांतल्या बेकार तरणाट्यांक नोकरी दिवंक तांणी कसलींच पावलां उखलूंक नात. नातर वचात आनी तुमच्या खासा दोळ्यांनी पळयात. प्रत्येक तालुक्यांत एक उद्देगीक वसणूक आसाच. म्हणचे सगळ्यो उण्योच 10 ते 15 उद्देगीक वसणुको आमच्या गोंयांत आसात. तातूंतल्यो फॅक्टरीस् कोण चलयता? आमचे क्रिस्ती तरणाटे न्हय, कित्याक थंय तार्वेना आनी शॅक्स नात. थंय थोडो घाम वारोवन चड दुडू जोडपाचीं मशिनां नात. थंय त्रास करून आनी घाम वारोवन वावुरतल्यांतें जैत जाता आनी आमचे भोव थोडे क्रिस्ती तरणाटे घाम वारोवन येस मेळोवंक फुडें सरतात.
हेर धंदे
ह्या धंद्या वरवीं स्वताचो उकल करताच पूण त्याच बराबर दुसऱ्या बेकार तरणाट्यांक नोकरी दिवन तांचेंय जिवीत सुखी करता. असले धंदे मात आमच्या क्रिस्ती गोंयकारां लागीं भोव थोडे आसात. नातर आमच्या हिंदू भावा- भयणांचेर नदर मारुया. दुसरे कितलेशेच धंदे आमचे हिंदू भाव – भयणीं चलयतात. वर्साचे 365 दीस ते वावुरतात आनी दुडू जोडटात. मेस्तपण, छापणावळ आनी प्रकाशन, फार्मास्युटिकल, मॅन्युफॅक्चरींग, आय.टी. अॅण्ड कम्प्यूटर्स , मेस्तपण, मॅन्युफॅक्चर ऑफ पार्ट, असेम्बल ऑफ टि.वी… आदीं धंदे आपणायतात. आनी पोटतिडकीन वावुरून आपलें आनी आपल्या फामिलीचें सूख अदीक पर्जळींत करता.
सरकारी नोकरी
सरकारी खात्यांनी नदर मारात. एका सरकारी खात्यान धरुंया शंबर कामदार आसात. ह्या शंबरांतले 10 कामदार पर्यांन क्रिस्ती समजांतले नात. म्हणचे 10 टक्के पर्यान न्हय. पूण क्रिस्ती मंत्र्यांचो सरकारांत आंकडो पळय. चवदां मंत्र्यां भितरले उणेंच ते 6 क्रिस्ती मंत्री आसात. म्हणचे सगळे उणेंच 40 ते 45 टक्के क्रिस्ती मंत्री आसात. 45 टक्के क्रिस्ती समाजांतले मंत्री आसात, पूण क्रिस्ती समाजांतले सरकारी नोकर मात 10 टक्के. हें कितें दाखयता? क्रिस्ती मंत्री फकत आपलो स्वताचो फायदो पळयतात. पूण आपल्या समाजाचो न्हय. आपूण स्वताक मंत्री जावपाक आमचे क्रिस्ती आमदार जितलो नेट धरता. तातूंतलो अर्दो पर्यांन नेट आपल्या समाजांतल्या बेकार तरणाट्यांक नोकरी दिवंक वापरिल्लो जाल्यार आयज आमच्या क्रिस्ती समाजाचें चित्र वेगळेंच आसतलें.
सोंपयतना…
उठात गोंयकांरानो उठात. क्रिस्ती तरणाट्यांनो उठात गोंयांतल्या शिक्षणीक, अर्थीक, संस्कृतीक आनी हेर मळांचेर क्रिस्ती तरणाट्यांचो उणाव दिसान दीस वाडत वेता. हाचेर ताकतिकेचो उपाय घेवप खूब म्हत्वाचें आसा. गोंयांत जर फकत 30 टक्के क्रिस्ती लोक आसात जाल्यार 30 टक्के जाग्यांचेर पूण तांकां हक्कान नोकऱ्यो मेळूंक नाकात? जेरुल मेळपाक जाय. पूण कळटा तशें घडना. ही व्हड दुख्खाची गजाल जावन आसा.
(लिप्यांतर : विशाल सिनाय खांडेपारकार, 8080622370)

तोमझीन कार्दोज
9822170102