भांगरभूंय | प्रतिनिधी
मॉवीन गुदिन्होः डबल इंजीन सरकाराक लागून उदरगतीचो दावो
भांगरभूंय । प्रतिनिधी
मुरगांवः प्रधानमंत्री नरेंद्र मोदी हांच्या व्हायब्रंट गुजरात खाला ल्हान राज्यांतल्या उद्देगांक आस्पावन उद्देगीक मळार आनीक क्रांती घडोवचे खातीर केंद्र सरकारान फुडाकार घेतला. ताका लागून गोंयांतल्या उद्देग मळाक बरे दीस येतले, अशें दाबोळीचे आमदार तशेंच पंचायत मंत्री मॉवीन गुदिन्हो हांणी सांगलें.
वास्को नवेवाडे वाठारांतल्या मुख्य रस्त्याच्या हॉटमिक्सीक डांबरीकरणाच्या कामाक सुरवात केले उपरांत मंत्री गुदिन्हो उलयताले. ह्या वेलार वास्कोचे आमदार कृष्णा साळकार, मुरगांवचे नगराध्यक्ष गिरीश बोरकार, राज्य मानव संसाधन विकास मंडळाचे उपाध्यक्ष दीपक नायक, नगरसेवक यतीन कामुर्लेकार, विनोद किनळेकार, नगरसेविका शमी साळकार, आदले उपनगराध्यक्ष सुदेश कोलगांवकार, समाज वावुरपी ब्रह्मानंद पवार, तुळशीदास पटेकार, निहाल केणी, सचीन चौगुले, साई कांबळी, संकेत लोटलीकार, कंत्राटदार परेश नायक आनी हेर मानेस्त हाजीर आशिल्ले.
गोंयांत डबल इंजीन सरकाराक लागून चारूय वटांनी उदरगतीचीं कामां येसस्वी तरेन पुराय जातात. प्रधानमंत्री नरेंद्र मोदी आनी मुख्यमंत्री डॉ. प्रमोद सावंत हांचें फुडारपण गोंयाक उदरगतीच्या कामांत मुखार घेवन वता, अशें मंत्री गुदिन्हो हांणी सांगलें.
नवेवाडेच्या सुमार अडेज किलोमिटर लांबायेच्या रस्त्याक सुमार दोन कोटी रुपया खर्च येतलो. फुडल्या दोन दिसां भितर हॉटमिक्सींग डांबरीकरणाचें काम पुराय जातलें. तशेंच वास्को शारा वांगडाच नवेवाडे, मांगोरहील वाठारांतल्या रस्त्याचेर कावलाक काडपाचे स्थितींत आशिल्ल्यो सगळ्यो गाडयो येरादारी पुलीस आनी मुरगांव पालिके वतीन काडपाचें काम हातांत घेतलां. ह्यो सगळ्यो गाडयो मुरगांव सड्या वयल्या पालिकेच्या कोयर प्रकल्पांत व्हरून उडयतले, अशें मंत्री गुदिन्हो हांणी सांगलें. वाडट्या अपघातांचेर नियंत्रण दवरचे खातीर येरादारी पुलिशेच्या आदारान म्हत्वाचे सुवातेर सीसीटीव्ही कॅमेरे लायतले, अशें आमदार साळकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
